ހއ. އުލިގަމަށް ކޮންކްރީޓު ގަލުގެ ދެވަނަ ޝިޕްމެންޓު ގެންގޮސްފިއެވެ.

އެކަން ހާމަކުރެއްވީ އެރަށުގެ ބަނދަރު ތަރައްގީކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއު ކުރިއަށްގެންދާ ކުންފުނި، އެމްޓީސީސީންނެވެ.

އެމްޓީސީސީން ވިދާޅުވީ މިއީ އެމަޝްރޫއުގެ ދަށުން، އެއްގަމުތޮށި ލުމަށް ބޭނުންވާ ކޮންކްރީޓް ގަލުގެ ދެވަނަ ޝިޕްމަންޓު ކަމަށެވެ. އަދި އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތް ވެސް ކުރިއަށްދާކަމަށް ވިދާޅުވިއެވެ.

އެ ރަށުގެ ބަނދަރު މައްސަލަ ހައްލުކޮށް ޒަމާނީ ފެންވަރަށް ބަނދަރު ތަރައްގީ ކުރުމަށް ސަރުކާރުން އެމްޓީސީސީއާ ހަވާލުކުރީ 2023 ޖުލައި 18 ގައެވެ. އެ މަޝްރޫއުގެ އަމަލީ މަސައްކަތް ފެށީ 2023 ސެޕްޓެމްބަރު ހަ ވަނަ ދުވަހުގައެވެ. އެ މަޝްރޫއު ނިންމަންދީފައިވާ މުއްދަތަކީ 18 މަސްދުވަހެވެ.

އުލިގަމު ބަނދަރު ތަރައްގީކުރުމުގެ މަޝްރޫއު އެމްޓީސީސީއާ ހަވާލުކުރީ 73.88 މިލިއަން ރުފިޔާއަށެވެ.

މި މަޝްރޫއުގައި ހިމެނިގެން ކުރާ މަސައްކަތްތަކުގެ ތެރޭގައި ކުރިން ފުންކޮށްފައިވާ ފަޅުން 10,400 ކިއުބިކް މީޓަރުގެ ސަރަޙައްދެއް ފުންކުރުމާއި، 46,181 ކިއުބިކް މީޓަރުގެ ސަރަޙައްދުގެ ބަނދަރު ފުންކުރުމާއި 21,708 ކިއުބިކް މީޓަރުގެ ސަރަޙައްދެއްގެ ނެރު ފުންކުރުން ހޮމެނެއެވެ. އަދި 238 މީޓަރުގެ ސަރަހައްދެއްގައި ބޭރުތޮށިލުމާއި 180 މީޓަރުގެ ސަރަޙައްދެއްގައި ރިވެޓްމެންޓް ޖެހުން ވެސް ހިމެނެއެވެ.

މިފަދަ މަޝްރޫއުތައް ހިންގުމަށް ރާއްޖޭގައި އެންމެ ގާބިލު ކުންފުންޏަށް އެމްޓީސީސީ ވާއިރު، ރާއްޖޭގެ ގިނަ ރަށްރަށުގެ މަޝްރޫއުތައް ވެސް ކުރަނީ އެ ކުންފުނިންނެވެ.