ހައުސިންގ ސްކީމުގެ މައްސަލަައަށް މިހައިތަނަށް 16 ފަރާތަކުން މައުލޫމާތު ހިއްސާކޮށްފައިވާކަމަށް ދިވެހި ފުލުހުންގެ ހިދުމަތުން ވިދާޅުވެއްޖެއެވެ.

އެ އިދާރާ އިން ވިދާޅުވީ އެ ހިދުމަތުން މިހާރު ހިންގަމުން ގެންދާ، ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް މައުލޫމާތު އެއްކުރުމަށް ގާއިމްކުރި ޕޯޓަލަށް 16 ފަރާތަކުން މައުލޫމާތު ދިންއިރު، އޭގެ ތެރެއިން 4 ފަރާތަކުން ގުޅުންހުރި ލިޔެކިޔުން ހިއްސާކޮށްފައިވާ ކަމަށެވެ.

މިހާރު ވެސް މި ޕޯޓަލް މެދުވެރިކޮށް މައުލޫމާތު ހިއްސާ ކުރުމުގެ ފުރުސަތު ހުޅުވިފައިވާއިރު، މައުލޫމާތާއި ހެކި ހިއްސާކުރާއިރު، އަމިއްލަ މައުލޫމާތު ހާމަނުކޮށް ވެސް ހުށަހެޅޭނެކަމަށް ފުލުހުން ވިދާޅުވެއެވެ. ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކު ވެސް ހިއްސާކުރެވޭނެ ކަމަށް ވަނީ ވިދާޅުވެފައެވެ.

ފުލުހުން ވަނީ މި ޕޯޓަލް މެދުވެރިކޮށް މައުލޫމާތު ހުށަހަޅުއްވާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަން ވެސް ދެއްވާފައެވެ.