އެމްޑީޕީގެ ސަރުކާރުގައި ފެނުނީ ކޮމިޝަންގެ މެންބަރުންނަށް ލިބިދީފައިވާ ބާރު ނިގުޅައިގަތް މަންޒަރު ކަމުގައި އެޓަރނީ ޖެނެރަލް އަލްއުސްތާޛު އަހްމަދު އުޝާމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި އޮކްޓޯބަރ 30 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި އުޝާމް ވަނީ ނިމިދިޔަ 5 އަހަރުގެ ތެރޭގައި ކިތައް ކޮމިޝަންގެ މެންބަރުންތޯ އެމްޑީޕީގެ މެޖޯރިޓީ އޮތް މަޖިލީހުން ވަކިކުރިތޯ ސުވާލުކުރައްވާފައެވެ.

އެމަނިކުފާނު ވިދާޅުވީ ދައުރުން ބޭރުން ޖަލްސާއެއް ބާއްވައިގެން އޭސީސީގެ ފަސް މެންބަރުން ވަކިކުރި ކަމަށާއި އީސީންނާއި ބްރޯޑްކާސްޓިންގ ކޮމިޝަންގެ މެންބަރުން ވަކި ކުރެއްވި ކަމަށެވެ.

"ބާރު ނިގުޅައިގަންނަން އުޅޭކަމަށްބުނެ އެބޭފުޅުން ވާހަކަދައްކަވަނީ ރަނގަޅު ނިޔަތެއް އޮވެގެނެއްނޫން." އޭޖީ ވިދާޅުވިއެވެ.

މީގެއިތުރުން އައު އިސްލާހާއެކު މިނިވަން މުއައްސަސާތަކަށް އައްޔަންކުރެވޭ ރައީސުންނާއި ނައިބު ރައީސުންނަށް ގާނޫނުން ލިބިދޭ ބާރު ކަށަވަރުކުރެވޭނެކަމަށް ވެސް ވިދާޅުވިއެވެ. އަދި ހުރިހާ މިނިވަން މުއައްސަސާތަކަކުން އެއްގޮތަކަށް ޢަމަލުކުރުން މުހިންމު ކަމަށް ވެސް ވިދާޅުވިއެވެ.

އޭޖީ އިތުރަށް ވިދާޅުވީ މިހާރު ގާނޫނު އޮންނަ ގޮތުން ރައީސުންނާއި ނައިބު ރައީސުންނަށް ގާނޫނުގައި ބުނާ މަސްއޫލިއްޔަތުތަކާއި ޒިންމާތައް އަދާކުރުމުގައި ދަތިތައް ދިމާވާ ކަމަށެވެ.

އުޝާމް ވިދާޅުވީ ބައެއް މިނިވަން މުއައްސަސާތަކުގެ ރައީސުންނާއި ނައިބު ރައީސުން އައްޔަންކުރަނީ ރައީސް މަޖިލީހަށް ނަން ފޮނުވުމުން، މަޖިލީހުން ރުހުން ދިނުމުން ކަމަށެވެ. އަދި އެންޓި ކޮރަޕްޝަން ކޮމިޝަނާއި އިލެކްޝަންސް ކޮމިޝަންގެ ގާނޫނަށް މިހާރު ގެނެވޭ އިސްލާހާއެކު ކުރިން މެންބަރުންގެ ވޯޓުން ރައީސާއި ނައިބު ރައީސް އިންތިހާބުކުރެވޭގޮތަށް އޮންނަ އޮތުން ބަދަލުކުރެވޭނެކަމަށެވެ.