ރައީސް ޑރ. މުޙައްމަދު މުޢިއްޒު ވެރިކަމުން އިސްތިއުފާ ދެއްވުމަށްވުރެ، ރައްޔިތުން ބޮޑަށް މިއަދު އެދޭނެ ކަމެއް ނެތް ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު އިސްވެ ހުންނަވައި، އުފައްދަވާފައިވާ ސިޔާސީ ޕާޓީ، ޕީއެންއެފް އިން ބޭއްވި ފްރަންޓް އޮފީސް ޖަލްސާގައި ވާހަކަފުޅު ދައްކަވަމުން ވިދާޅުވީ ރައީސުލްޖުމްހޫރިއްޔާ ވެރިކަން ކުރައްވަން ވާނީ ލަފަޔާއި މަޝްވަރާގެ މަތިން ކަމަށެވެ. އަދި ގާނޫނުއަސާސީގެ ރޫހަކީ ވެސް އެއީ ކަމަށެވެ.

މީގެއިތުރުން ކެބިނެޓެއް އޮތުމުގެ މައިގަނޑު ސަބަބަކީ ވެސް އެއީ ކަމަށާއި ކެބިނެޓަކީ ރައީސަށް ލަފާ އަރުވާ ތަނެއް ކަމަށް ވިދާޅުވިއެވެ. އަދި ތަޖުރިބާ ހުރި މީހުންގެ ބަސް ނުހޯދާ ރައީސް ޑރ. މުއިއްޒު އަށް ވިސްނިވަޑައިގަންނަވާ ގޮތަށް އެކަނި ކަންކަން ކުރުމަކީ ގައުމުގެ ކަންކަން ގޯސްކޮށް ދާ އެއް ސަބަބު ކަމަށް އެމަނިކުފާނު ވިދާޅުވިއެވެ.

ރައީސް ޔާމީން ވަނީ ކޮންމެ މީހަކު މަސައްކަތް ކުރައްވަން ޖެހޭނީ ސީދާ އެމަނިކުފާނު ބުނާ ގޮތަށް ކަމަށާއި އަދި ފަހު ބަސް ބުނާނީ ވެސް އެމަނިކުފާނު ކަމަށެވެ. އަދި ވިދާޅުވީ ކޮންމެ މަގާމަކަށް ވެސް ލާނީ ބުނާގޮތް ހަދާ މީހުން ކަމަށާއި ބުނާ ގޮތް ނުހަދާ މީހުން ވަޒީފާއިން ވަކިކުރައްވާނެ ކަމަށެވެ.

ރައީސް ޑރ. މުއިއްޒުގެ ކިބައިން ފެންނަނީ ހަރުކަށިކަމާއި ގޮތް ދޫ ނުކުރުން ކަމަށާއި ރައީސް ޑރ. މުއިއްޒުގެ މައްޗަށް ތުހުމަތު ކުރެވިފައި ހުރި އެތަކެއް މައްސަލަތަކެއް މިހާރު ވެސް އޭސީސީގައި އެބަހުރި ކަމަށް ރައީސް ޔާމީން ވިދާޅުވިއެވެ.