އަހަރުގެ ކޮންމެ އިރެއްގައިވެސް އުމްރާއަށް މީހުން ގެންދެވޭނެ ގޮތް ހެދުމަކީ މުހިންމުކަމެއް ކަމުގައި އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރާއްޖޭގައި ފުރަތަމަ ފަހަރަށް ބާއްވާ "ޙައްޖު، ޢުމްރާ ކޮންފަރެންސް" ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.

ސައުދީ އަރަބިއްޔާގައި ހައްޖާއި އުމްރާގެ ހިދުމަތަށް ގެންނަ ނިޒާމީ ބަދަލުތަކާއެކު ރާއްޖެއިން ވެސް މި ހިދުމަތް ފޯރުކޮށްދިނުމުގައި ނިޒާމީ ބަދަލުތަކެއް ގެންނަން ޖެހޭކަމަށާއި ނިޒާމަށް ގެންނަން ޖެހޭ ބަދަލުތައް ގެންނާނީ މިފަދަ ކޮންފަރެންސްތަކުގެ އަލީގައި ޖަމާއަތްތަކުގެ މަޝްވަރާގެ މަތިންކަމަށް މިނިސްޓަރު ވިދާޅުވިއެވެ.

މީގެއިތުރުން ރާއްޖޭގައި އުމްރާގެ ހިދުމަތް ދޭ ގިނަ ކުންފުނިތަކެއް ހުރިނަމަވެސް އުމްރާއަށް މީހުން ގެންދަނީ ވަކި ދުވަސްވަރެއްގައިކަން ފާހަގަކުރައްވައި، އޭގެ ބަދަލުގައި އަހަރުގެ ކޮންމެ އިރެއްގައި ވެސް އުމްރާއަށް މީހުން ގެންދެވޭނެ ގޮތް ހެދުމަކީ މުހިންމުކަމެއްކަން ފާހަގަކުރެއްވިއެވެ.

އެގޮތުން މައްކާ އާއި މަދީނާގައި ވެސް ޕެކޭޖްތަކުގެ އަގު ބޮޑުވަނީ ހަރަމްފުޅާ ކައިރިން ހޮޓަލްތައް ނަގާތީ ކަމަށާއި ހަރަމްފުޅާ ދުރުން ހޮޓަލްތައް ނެގުމުން އުމްރާ ޕެކޭޖުތައް އަގުހެޔޮވާނެކަން ފާހަގަކުރެއްވިއެވެ.