މޯލްޑިވިސް ކޮލިފިކޭޝަންސް އޮތޯރިޓީ (އެމްކިޔުއޭ) އަށް ޕްރޮގްރާމް އޮޑިޓްކުރުމަށް ހުށަހަޅާފައިވާ 10،000 ފޯމުތަކުގެ ތެރެއިން މިހާތަނަށް ޖުމްލަ 6،830 ފޯމުގެ މަސައްކަތް ވަނީ ފުރިހަމަކުރެވިފައި ކަމަށް އެ އޮތޯރިޓީން ހާމަކުރައްވައިފިއެވެ.

އެ އޮތޯރިޓީން ހާމަކުރައްވާފައިވާ ގޮތުގައި ޕްރޮގްރާމް އޮޑިޓްގެ މައިގަނޑު މަގްސަދަކީ ރާއްޖޭގައި ކުރިއަށްގެންދާ މަތީ ތައުލީމާއި ތަމްރީން ޕްރޮގްރާމްތަކަކީ ފެންވަރު ރަނގަޅު ޕްރޮގްރާމްތަކެއްކަން ކަށަވަރުކުރުމެވެ.

އެގޮތުން ރާއްޖޭގެ މަތީ ތައުލީމާއި ތަމްރީނުތަށް ފޯރުކޮށްދޭ މަރުކަޒުތަށް ބަލައި ޗެކްކުރުމާއި، އެ މަރުކަޒުތަކުން ހިންގާ ކޯސްތަކާއި ޕްރޮގްރާމްތަކުގެ ފެންވަރު ކަނޑައަޅައި، އެ ޕްރޮގްރާމްތަށް ކުރިއަށްގެންދަނީ ޤަވާއިދާއި ޤާނޫނާއި ހަމަތާކާއި އެއްގޮތަށްކަން ކަށަވަރުކުރުމުގެ މަސައްކަތް އެމްކިޔުއޭ އިން ދަނީ ކުރަމުންނެވެ.

ދިވެހި ސަރުކާރުގެ އަމާޒަކީ ރާއްޖޭގެ އެކި ކަންކަޅުތަކުން ފެންވަރު ރަނގަޅު މަތީ ތަޢުލީމު ހާޞިލުކުރުމުގެ ފުރުޞަތުތަށް ފަހިކޮއްދިނުމާއި، ރާއްޖެއަށް ބޭނުންވާ އެކި ދާއިރާތަކުގައި މަސައްކަތްކުރާނެ ހަރުދަނާ ޒުވާނުން ބިނާކުރުމެވެ. މި އަމާޒަށް ވާޞިލްވުމަށް، އެމްކިޔުއޭ އިން ދަނީ ޕްރޮގްރާމް އޮޑިޓް، ރިކޮގްނިޝަން ވެލިޑޭޝަން ފަދަ އެތަށް މަސައްކަތްތަކެއް ކުރިއަށްގެންދަމުންނެވެ.