ޕަބްލިކް ސަރވިސް މީޑިއާ (ޕީއެސްއެމް) ގެ އެޑިޓޯރިއަލް ކޮންޓެންޓާ ހިލާފު ވީޑިއޯއެއް ދެއްކި މައްސަލައިގާ އަހްމަދު މުސްތަފާ، ޕީއެސްއެމް އިން ވަކިކޮށްފިއެވެ.

އެކަމާއިގުޅިގެން ޕީއެސްއެމް އިން ނެރެފައިވާ ބަޔާނެއްގައި ވަނީ ނޫސްވެރިކަމުގެ 11 ވަނަ އެވޯޑު ދިނުމުގެ ހަފުލާ އެ މީޑިއާ އިން ލައިވްކޮށް ދުރަށް ދައްކަމުންދިޔައިރު، ހަފުލާގެ ތެރޭގައި އެޑިޓޯރިއަލް ކޮންޓެންޓާ ހިލާފު އަދި ނޫސްވެރިކަމުގެ އާންމު މިންގަނޑުތަކާ ހިލާފު ވީޑިއޯއެއް އެ ހަފުލާ އިންތިޒާމުކުރި އެމްއެމްސީން ދައްކާފައިވާ ކަމަށެވެ.

އެވޯޑު ލިބޭ ކެޓަގަރީތަކާއި އެ ކެޓަގަރީތަކަށް ނޮމިނޭޓްވެފައިވާ ފަރާތްތަކާއި އެވޯޑު ލިބޭ ފަރާތްތައް ދުރާލައި އެމްއެމްސީއަށާއި އެ ކައުންސިލުގެ އިސްވެރިންނަށް އެނގިވަޑައިގަންވާނޭ ކަމަށް ދެކޭ ކަމަށް ޕީއެސްއެމްގެ ބަޔާނުގައި ވެއެވެ. އަދި ލައިވް ކަވަރޭޖު ހަދާ ހަފުލާތަކުގައި ދައްކާ ވީޑިއޯ ފުޓޭޖުތަކަކީ ޕީއެސްއެމްގެ އެޑިޓޯރިއަލަށް ފެތޭ ކޮންޓެންޓަށް ވާން ޖެހޭނެ ކަމަށް ވެސް ބުނެފައި ވެއެވެ.

މީގެއިތުރުން ކުރިން އެންގުމެއްނެތި ކުއްލިއަކަށް ހަފުލާގެ ތެރޭގައި އެ ވީޑިއޯ ދެއްކީ ގަސްތުގައި ރާވައިގެން، އެޑިޓޯރިއަލް އުސޫލާ ހިލާފު ކޮންޓެންޓު ދެއްކުމަށް އެމްއެމްސީން ކުރި ކަމެއް ކަމުގައި ވެސް އެ ބަޔާނުގައި ވެއެވެ.

"އެކަމަކީ އެ މީޑިއާއަށް ރައްޔިތުން ކުރަމުން އަންނަ އިތުބާރު ގެއްލި، ކުންފުނީގެ މައްޗަށް އޮތް ގާނޫނީ ވާޖިބުތައް އަދާކުރުމަށް ހުރަސްއެޅި، އިއާދަނުކުރެވޭނެ ވަރުގެ ގެއްލުން ލިބިދާނެ ފަދަ އަމަލެއް ކަމުގައި ދެކެމެވެ." ޕީއެސްއެމްގެ ބަޔާނުގައި ވަނީ ބުނެފައެވެ.

ހަމަމިއާއެކު އެމްއެމްސީއަށް ގާނޫނުން މަތިކޮށްފައިވާ ޒިންމާތައް ޒިންމާދާރުކަމާއެކީ އަދާކުރުމަށާއި އެންމެހައި ފަރާތްތަކުގެ ހައްގުތަކަށް ހުރުމަތްތެރިކޮށް ހިތުމަށް ވެސް ޕީއެސްއެމް އިން ވަނީ އިލްތިމާސްކޮށްފައެވެ.

ޕީއެސްއެމްގައި 30 އަހަރުގެ މުއްދަތަކަށް ހިދުމަތްކުރައްވައިފައިވާ މުސްތަފާ އެމްއެމްސީގެ 7 ވަނަ ދައުރަށް އިންތިހާބުވެވަޑައިގެންނެވީ 2022 ވަނަ އަހަރުގެ ޑިސެމްބަރު މަހުގެ ތެރޭގައެވެ. އަދި މުސްތަފާގެ ދައުރު އަންނަ ޑިސެމްބަރު މަހުގެ ތެރޭގައި ހަމަވާނެއެވެ.