މަރުހޫމާ ޝަހީބާ މުޙައްމަދު ނިޔާވުމުގެ ހިތާމައިގައި، އާއިލާއަށް ރައީސް ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

ދިވެހި ދައުލަތަށް 44 އަހަރަށްވުރެ ގިނަ ދުވަހު ހިދުމަތްކުރައްވައި، ގައުމީ އިނާމު ހާސިލްކުރައްވާފައިވާ ޝަހީބާ ނިޔާވުމާއި ގުޅިގެން މީސްމީޑިއާގައި ހިއްސާކުރެއްވި ޕޯސްޓެއްގައި ރައީސް ވަނީ މަރުހޫމާއަށް މާތްﷲގެ ރުއްސެވުމާއި ފުއްސެވުން އަދި ސުވަރުގޭގެ ދާއިމީ ނިޢުމަތުގައި ލެހެއްޓެވުމަށް އެދި ދުޢާ ކުރައްވާފައެވެ.

ގ. ގްރޭވިއު، ޝަހީބާ މުޙައްމަދު، ދައުލަތުގެ ޚިދުމަތް ފެށްޓެވީ، 17 ޖޫން 1962 ގައި ޕޯސްޓް އޮފީހުގެ ވަގުތީ ކާތިބާއެއްގެ ވަޒީފާއިންނެވެ. 44 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވުމަށްފަހު، ދައުލަތުގެ ޚިދުމަތުން ވަކިވެވަޑައިގަތީ، 27 ޑިސެންބަރު 2009 ގައެވެ.

ޚިދުމަތުގައި ހޭދަކުރެއްވި ދިގު މުއްދަތުގެ ތެރޭގައި، ދައުލަތުގެ ތަފާތު ދާއިރާތަކުގައި ޝަހީބާ މުޙައްމަދު ވަނީ ޚިދުމަތް ކުރައްވައިފައެވެ. އެގޮތުން އެންމެ ދިގު މުއްދަތަކަށް ޚިދުމަތް ކުރެއްވީ ސައިންސް އެޑިޔުކޭޝަން ސެންޓަރުގައެވެ. އެ ސެންޓަރުގެ އިދާރީ މަޤާމުތަކުގައި 20 އަހަރަށްވުރެ ދިގު މުއްދަތެއްގައި ޝަހީބާ މުޙައްމަދު މަސައްކަތްކުރެއްވިއެވެ.

މީގެއިތުރުން ރައްޔިތުންގެ މަޖިލީހުގެ ސީނިއަރ ސެކްރެޓަރީގެ މަގާމާއި، އިދާރީ އެކި މަގާމުތަކުގައި 9 އަހަރަށްވުރެ ދިގު މުއްދަތަކަށް ޚިދުމަތް ކުރެއްވިއެވެ.

އުމުރުން 77 އަހަރުގެ ޝަހީބާ މުޙައްމަދުއަށް ދިވެހި ދައުލަތަށް ޚިދުމަތް ކުރުމުގެ އިނާމު ލިބިވަޑައިގެންނެވީ މިއަހަރުގެ މިނިވަން ދުވަހުގެ ޖަލްސާގައެވެ.