ދައުލަަތަށް އާމްދަނީ ވަންނަ މަޝްރޫއުތަކަށް ގައުމު ވަނީ ބޭނުންޖެހިފައި ކަމުގައި ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޕީއެންއެފް އިން އޮކްޓޯބަރ 31 ވަނަ ދުވަހުގެ ރޭ ބޭއްވި ފްރަންޓް އޮފީސް ޖަލްސާގައެވެ.

ރައީސް ޔާމީން ވިދާޅުވީ ގައުމެއް ރަނގަޅުގޮތުގައި ހިންގޭނީ ދައުލަތަށް އާމްދަނީ ވަންނަ ފަދަ މަޝްރޫއުތައް ހިންގައިގެން ކަމަށެވެ. އަދި ދިވެހި ގައުމު މިއަދުމިވަނީ މިފަދަ މަޝްރޫއުތަކަށް ބޭނުން ޖެހިފައި ކަމަށެވެ.

މިގޮތުން މަޝްރޫއުތައް ހިންގެވުމަށް 9 ބިލިއަންގެ އަދަދެއް ބަޖެޓުން ފާސްކޮށް، 2 ބިލިއަން ޚަރަދުވީއިރު، ބަޖެޓް ޑެފިސިޓަށް ދިޔަ ގޮތް ހާމަކުރުމަށް އެމަނިކުފާނު ވަނީ ގޮވާލައްވާފައެވެ. އަދި ބަޖެޓް 22 މިލިއަން ޑެފިސިޓް ވެފައިވާ ކަމަށް ފާހަގަކުރައްވައި، 11 ގުނަ ޑެފިސިޓް އިތުރުވީ ދައުލަތަށް ނޭގިތޯ ވެސް ވަނީ ސުވާލު އުފައްދަވާފައެވެ.

"ނޫންނަމަ މިއީ މި ސަރުކާރުން ހިންގާފައިވާ ޖަރީމާއެއްތޯ؟" އެމަނިކުފާނު ވިދާޅުވިއެވެ.

ގާނޫނުގައި ބުނެފައިވާ ގޮތުން ބަޖެޓަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހަށް ހުށަހަޅާ އެ ބިލު ފާސްވެގެންކަން ފާހަގަކުރައްވައި، ރައީސް ޔާމީން ވަނީ 9 ބިލިއަނުން 2 ބިިލިއަން ޚަރަދުކޮށް ބާކީ ހަތް ބިލިއަން ވީގޮތެއް އިނގޭ މެންބަރަކު ވެސް ނެތް ކަމަށް ސިފަކުރައްވާފައެވެ.

އެމަނިކުފާނި ވަނީ ބަޖެޓުގެ ހިސާބުތައް ސިއްރުކުރީ މިފަދަ އޮޅުން ބޮޅުންތައް ހުރުމުން ކަމަށް ވެސް ވިދާޅުވެފައެވެ.