މި މަހުގެ 9 ވަނަ ދުވަހު ބާއްވަން އޮތް ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު މިމަހުގެ 23 ވަނަ ދުވަހަށް ފަސްކޮށްފިއެވެ.

ޕީއެންސީން ނެރުނު ބަޔާނެއްގައި ވަނީ އެ ތާރީހަށް ބަދަލުގެނައީ މި ނޮވެމްބަރ މަހުގެ 10 ވަނަ ދުވަހަކީ ރަސްމީ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖެއްސެވުމާ ގުޅިގެން ކަމަށެވެ.

" މިމަހުގެ 8 ވަނަ ދުވަހުން ފެށިގެން ލިބޭ 4 ދުވަހުގެ ބަންދުގައި ގިނަ ބަޔަކު ރަށުން ބޭރަށް ދަތުރުކުރާނެ. އެހެންކަމުން 9 ވަނަ ދުވަހު އިންތިހާބު ބާއްވައިފިނަމަ މެންބަރުންނަށް ވޯޓުލުމަށް ދަތިވާނެ." ޕީއެންސީން ބުންޏެވެ.

މީގެއިތުރުން ތާރީހަށް ބަދަލު ގެނައީ ގިނަ އަދަދެއްގެ ކެންޑިޑޭޓުންނާއި ޕާޓީގެ މެންބަރުންގެ އެދެމުގެ މަތީންކަމަށް ވެސް އެ ބަޔާނުގައި ވަނީ ބުނެފައެވެ. އަދި އިންތިޚާބު ބާއްވާ ތާރީހު ފަސްކުރުމާއި ގުޅިގެން އިންތިހާބުކުރަންޖެހޭ މަގާމުތަކާއި ކެންޑިޑޭޓުންގެ ނަންތަކާއި ވޯޓުލެވޭ މީހުންގެ ލިސްޓު އާންމުކުރާނީ މިމަހުގެ 10 ވަނަ ދުވަހު ކަމަށް ވެސް ބަޔާނުގައި ބުނެފައި ވެއެވެ.

ޕީއެންސީގެ އެތެރޭގެ އިންތިހާބުގައި ދާއިރާތަކުގެ ރައީސުންނާއި ނައިބުރައީސުން އަދި ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިންގ ކޮމިޓީތަކުގެ މެންބަރުން އިންތިހާބު ކުރުމަށް ވަނީ ނިންމާފައެވެ.