ސަރުކާރުން ވަނީ ބަޖެޓް ކަނޑައެޅުމުގައި ގާނޫނާ ހިލާފުވެފައި ކަމުގައި ދަ ޑިމޮކްރެޓްސް އިން ބުނެފިއެވެ.

އެ ޕާޓީން ނެރުނު ބަޔާނެއްގައި ވަނީ ދިވެހި ޖުމްހޫރިއްޔާގެ ގާނޫނުއަސާސީގައި، ދިވެހި ވެރިކަމުގެ އެންމެހައި ބާރުތައް ފެށިގެން އަންނާނީ އަދި އެބާރުތައް ދެމިއޮންނާނީ ރައްޔިތުންގެ ކިބައިގާ ކަމަށް ކަނޑައަޅާފައިވާ ކަމަށެވެ.

"އެ ގާނޫނުއަސާސީގެ 8 ވަނަ ބާބުގައި ދިވެހިރާއްޖެ ހިންގާންވާނީ ލާމަރުކަޒީ އުސޫލުންކަމަށް ކަނޑައަޅާފައި ވާއިރު، މި އުސޫލު ހިފެހެއްޓުމާއި ކުރިއެރުވުމާއި ޑިމޮކްރެޓިކް ހިންގުން އަށަގަންނެވުމާއި ކުރިއެރުވުމަކީ މުޅި ދައުލަތުގެ ޒިންމާއެކެވެ." އެ ބަޔާނުގައި ވެއެވެ.

ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި، ކައުންސިލުގެ އިހުތިސާސް ކަނޑައެޅި، ކައުންސިލްތަކުގެ އިހުތިސާސްގެ ތެރޭގައި ހިމެނޭ ރައްޔިތުންނަށް ފޯރުވައިދޭންޖެހޭ ރަށްވެހި ހިދުމަތްތައް ފޯރުވައިދިނުމަށް، ދައުލަތުގެ ބަޖެޓުގެ ޖުމްލަ އާމްދަނީގެ މަދުވެގެން 5 އިންސައްތަ ކައުންސިލުތަކަށް ދޭންވާނެކަމަށް ކަނޑައަޅާފައި ވަނިކޮށް، ކަނޑައެޅިގެން ލާމަރުކާޒީ ގާނޫނާ ހިލާފަށް ކައުންސިލުތަކަށް ހައްގުވާ ބްލޮކް ގްރާންޓުން ވަރަށް ބޮޑު މިންވަރެއް އުނިކޮށް، މާލީ ވަޒީރު ގާނޫނާ ހިލާފުވެފައިވުމަކީ އެ ޕާޓީން ނުހަނުކަންބޮޑުވެ ކުށްވެރިކުރާ ކަމެއް ކަމުގައި ވެސް އެ ބަޔާނުގައި ވެއެވެ.

މީގެއިތުރުން ލާމަރުކަޒީ އުސޫލު ކުރިއަރުވައި، ބާރުވެރިކުރުމުގެ ޒިންމާއަކީ ވަޒީރަކަށް ނުވަތަ ވެރިޔަކަށް ނުވަތަ މުއައްސަސާއަކަށް ވިޔަސް އޮތް އިހުތިޔާރީ ކަމެއް ނޫން ކަމަށާއި އެއާ ހިލާފަށް އެއީ ދުސްތޫރީ އަދި ގާނޫނީ ވާޖިބެއް ކަމަށް ވެސް ޑިމޮކްރެޓުން ވަނީ ބުނެފައެވެ.

އެ ޕާޓީން ބުނީ ގާނޫނުގައި ވަކި މުއައްސަސާއަކަށް ވަކި ނިސްބަތަކުން ފައިސާ ދިނުމަށް ލާޒިމުކުރުމުން އެ ނޫން ގޮތަކަށް ދައުލަތުގެ ބަޖެޓު އެކުލަވާލުމަކީ ސަރުކާރަށް ވެސް އަދި ރައްޔިތުންގެ މަޖިލީހަށް ވެސް އޮތް ބާރެއް ނޫން ކަމަށެވެ. އަދި އެއީ ކަނޑައެޅިގެން ގާނޫނާ ހިލާފުވުމުގެ ޢަމަލެއް ކަމަށެވެ.

އެހެންކަމުން އެފަދައިން ޢަމަލުނުކުރެއްވުމަށާއި ގާނޫނީ އިމުގެ ތެރެއަށް ރުޖޫއަވެވަޑައިގަތުމަށް މާލީ ވަޒީރަށާއި ސަރުކާރަށް އެ ޕާޓީން ވަނީ އިލްތިމާސްކޮށްފައެވެ.