ބ. ދަރަވަންދޫ ކަނބަލުންނަށް ހާއްސަކޮށްގެން އެރަށުގައި "މޫދުކަސްރަތުން އުފާވެރިކަން" ޕްރޮގްރާމް ހިންގައިފިއެވެ.

މިއީ އެމްއެންޑީއެފް ނޮދަން އޭރިއާ ކޮމާންޑާއި އެރަށު އަންހެނުންގެ ތަރައްގީ އަށް މަސައްކަތްކުރާ ކޮމެޓީއާ ގުޅިގެން ހިންގި ޕްރޮގްރާމެކެވެ.

މި ޕްރޮގްރާމް ނިންމުމުގެ ރަސްމިއްޔާތު ބާއްވާފައިވަނީ ނޮވެމްބަރ 1 ވަނަ ދުވަހުގެ ހަވީރު ދަރަވަންދޫ "ރަސްގެ އޮޑި މާލަން" ގައެވެ. މި ރަސްމިއްޔާތު ޝަރަފުވެރިކޮށްދެއްވައި، އެ ޕްރޮގްރާމްގެ މުއްދަތުގައި ބަރުދަން ލުއިކުރި ބައިވެރިންގެ ތެރެއިން އެންމެ ބޮޑަށް ބަރުދަން ލުއިކުރި ތިން ފަރާތަށް ސެޓްފިކެޓާއި އެވޯޑް ހަވާލުކޮށްދެއްވީ އެމްއެންޑީއެފް ނޮދަން އޭރިއާ ކޮމާންޑުގެ ޑެޕިއުޓީ ކޮމާންޑަރ، ލެފްޓިނެންޓް ކާނަލް އަޙްމަދު ބޫލާޤެވެ.

މިއީ ރައްޔިތުންނަށް ބޭނުންވާ ދުޅަހެޔޮކަމާއި، ދުޅަހެޔޮ ސިއްހަތާއި، ރައްޔިތުން ބާރުވެރިކުރުމާއި، އިޖުތިމާއީ ފޭރާން ވަރުގަދަކުރުމަށް ބޭއްވި ޕްރޮގްރާމެކެވެ. އަދި އެއްބަޔަކު އަނެއްބަޔަކަށް އިހްތިރާމްކުރާ، އެކުވެރިކަމާއެކު ގުޅިގެން މަސައްކަތްކުރާ އެއްބައެއްވަންތަ މުޖުތަމައެއް ބިނާކުރުމެވެ.

މި ޕްރޮގްރާމްގައި ރައްޔިތުންނަށް ބޭނުންވާ ދުޅަހެޔޮ ސިއްހަތާއި، ދުޅަހެޔޮ ސިއްހަތެއްގައި ހުރުމަށް ކަސްރަތު ކުރުމުގެ މުހިންމުކަމާއި، ކަސްރަތުން ލިއްބައިދޭ ފައިދާތަކާއި، ކަސްރަތު ކުރަންވީ ރަނގަޅު ގޮތްތަކާއި، ރަނގަޅު ސިއްހަތެއްގައި ހުރުމަށް ރަނގަޅު ކާނާ ކެއުމުގެ މުހިންމުކަމާ ބެހޭގޮތުން ޕްރޮގްރާމުގެ ބައިވެރިންނަށް ވަނީ މައުލޫމާތު ދީފައެވެ.

މީގެއިތުރުން މި ޕްރޮގްރާމްގައި ބައިވެރިންނަށް އެއްބަޔަކު އަނެއް ބަޔަކަށް އިހްތިރާމްކުރުމާއި، ލީޑަރޝިފާއި ތަރުތީބުން ކަންކަން ކުރުމުގެ މުހިންމުކަމާއި، އަދަބު އަހްލާގާއި، ރިވެތި އާދަކާދަތަކާއި، ގަޑިއަށް ފަރުވާތެރިކަން ބެހެއްޓުމާއި އެކުވެރިކަމާއެކު ގުޅިގެން މަސައްކަތްކުރާ އެއްބައިވަންތަ ބައެއްގެ ގޮތުގައި މަސައްކަތްކުރާނެ ގޮތާއި އާދަތައް ކިޔަދީފައިވެއެވެ.

މި ޕްރޮގްރާމް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި ޕްރޮގްރާމުގެ 11 ބައިވެރިންނަށް ވަނީ ތަމްރީން ދެވިފައެވެ.

މި ރަސްމިއްޔާތުގައި "މޫދުކަސްރަތުން އުފާވެރިކަން" ފުރިހަމަކުރެއްވި ބައިވެރިންނަށް ހަނދާނީ ލިޔުން ހަވާލުކޮށްދެއްވާފައި ވަނީ ބ.ދަރަވަންދޫ ކައުންސިލްގެ ނައިބު ރައީސް، އަލްފާޟިލް ޙުސައިން ނާޒިމްއާއި އެ ކައުންސިލްގެ މެންބަރުންގެ އިތުރުން އެ ރަށުގެ އެކި މުއައްސަސާތަކުގެ ވެރިންނެވެ.

އޮކްޓޫބަރު 9 އިން 29 އަށް ހިންގި މި ޕްރޮގްރާމް، އެ ރަށުގެ 58 އަންހެނުން ފުރިހަމަކުރިއެވެ. މި ޕްރޮގްރާމްގައި ކުލާސްތައް ނަގައިދިނީ އެމްއެންޑީއެފް ނޮދަން އޭރިއާ ކޮމާންޑްގެ ފިޒިކަލް ފިޓްނަސް އިންސްޓްރަކްޓަރުންނެވެ.