އިސްލާމީ މަރުކަޒު ސާފުކޮށް ރީތިކުރުމުގެ މަސައްކަތް އިސްލާމިކް މިނިސްޓްރީގެ މުވައްޒަފުން ކުރިއަށް ގެންގޮސްފިއެވެ.

މިއީ އެ މަރުކަޒަށް 40 އަހަރު ފުރޭ މުނާސަބަތާއި ގުޅިގެން ކުރިއަށް ގެންދިޔަ ހަރަކާތެކެވެ.

ނޮވެމްބަރ 2 ވަނަ ދުވަހު އިސްލާމިކް މިނިސްޓްރީގެ އިސްވެރިންނާއި، މުވައްޒަފުން ވަނީ އިސްލާމީ މަރުކަޒުގައި ކުލަ ލައި، ގަސްބުރުތައް ސާފުކޮށް ރީތިކުރުމުގެ މަސައްކަތް ކޮށްފައެވެ. އަދި މުންނާރު ސާފުކުރުމާއި ކުނި އުކާލުމުގެ މަސައްކަތް ވެސް ކޮށްފައި ވެއެވެ.

މި މަސައްކަތްތަކުގައި މިނިސްޓްރީގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ.

މަރުކަޒުގެ ބަގީޗާތައް ރީތިކުރުމަށް މިނިސްޓްރީގެ މުވައްޒަފުން ގަސް ހޯދާފައިވާއިރު، ހެޔޮ އެދޭ އެކި ފަރާތްތަކުން ވެސް ވަނީ މި މަސައްކަތަށް އެހީތެރިކަން ފޯރުކޮށްދީފައެވެ.

އިސްލާމީ މަރުކަޒަށް 40 އަހަރު ފުރޭނީ ނޮވެމްބަރު މަހުގެ 11 ވަނަ ދުވަހުއެވެ. މި މުނާސަބާ އާއި ގުޅިގެން އެކި ކަންކަން އަންނަނީ ރާވަމުންނެވެ.