މި އަހަރުގެ ނަސްރުގެ ދުވަހުގެ މުނާސަބަތުގައި އެމްއެންޑީއެފް އިން ގިނަ ހަރަކާތްތަކެއް ބާއްވަން ނިންމައިފިއެވެ.

އެގޮތުން މި ހަރަކާތްތައް ފެށުމަށް ހަމަޖެހިފައިވަނީ ނޮވެންބަރު 3 ވަނަ ދުވަހު ސިފައިން ބައިވެރިވެގެން އިސްލާމީ މަރުކަޒުގެ ޖަމާއަތުގައި ކުރާ ފަތިސް ނަމާދުންނެވެ. އެއަށްފަހު، އެ ދުވަހު ހެނދުނު، ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު އޮންނާނެއެވެ.

މީގެއިތުރުން އެ ދުވަހު ހެނދުނުގެ އެންމެ ފަހު ހަރަކާތެއްގެ ގޮތުގައި އޮންނާނީ "ނަޞްރު ދުވަހުގެ ސިފައިންގެ މައުރަޒު" ހުޅުވުމެވެ. މިއަހަރުގެ "ސިފައިންގެ މައުރަޒު" ބޭއްވުމަށް ހަމަޖެހިފައިވަނީ ނޭޝަނަލް އާޓް ގެލަރީގައެވެ.

ނަޞްރުގެ ދުވަސް ފާހަގަކުރުމުގެ ގޮތުން އެ ދުވަހުގެ ހަވީރު އެމްއެންޑީއެފުން ޖުމްހޫރީ މައިދާނުގައި ހާއްސަ މިލިޓަރީ ޑިސްޕްލޭއެއް އާއްމުންނަށް ހުޅުވާލައިގެން ކުރިއަށް ގެންދިއުމަށް ވެސް ވަނީ ހަމަޖެހިފައެވެ. އަދި އެ ދުވަހުގެ ރޭ ބާއްވާ ނަޞްރު ދުވަހުގެ ހާއްސަ ޖަލްސާ އޮންނާނީ ދަރުބާރުގޭގައެވެ.

މިއަހަރުގެ ނަޞްރުގެ ދުވަހުގެ މުނާސަބަތުގައި އެމްއެންޑީއެފް އޭރިއާ ކޮމާންޑްތަކުގައި ވެސް ގިނަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ.