ރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު ޑރ. މުޙައްމަދު ޒާހިރު ޙުސައިނަށް އަރުވައިފިއެވެ.

އެމަނިކުފާނަށް، ރައީސް ޑރ. މުޙައްމަދު މުޢިއްޒު މި ޝަރަފް އަރުއްވާފައިވަނީ ޖުމްހޫރީ ދުވަހުގެ މުނާސަބަތުގައި ނޮވެމްބަރ 10 ވަނަ ދުވަހުގެ ރޭ ބޭއްވި ރަސްމީ ޖަލްސާގައެވެ.

ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ކަމުގެ މަގާމުގައި މިހާރު ހުންނެވި ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިނަށް މި ޝަރަފު އެރުވުމަށް ރައީސް ނިންމެވީ، ދިވެހިރާއްޖޭގެ ތަޢުލީމީ ތަރައްގީއަށާއި، ރާއްޖޭގައި ތައުލީމު ފުޅާކުރެއްވުމަށް ކޮށްދެއްވާފައިވާ ގިނަގުނަ މަސައްކަތުގެ އަގު ވަޒަން ކުރުމުގެ ގޮތުންނެވެ.

މީގެއިތުރުން ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިހްލާސްތެރިކަމާއެކުގައި، ގިނަގުނަ ހިދުމަތްތަކެއް ކޮށްދެއްވާފައިވާތީއެވެ.

މި ޖަލްސާގައި، މަތީ ދަރަޖަ ހޯދާ ފަރާތްތަކަށް ރައީސް ދެއްވާ ހާއްސަ އިނާމު މި އަހަރު އިނާމު 40 ބޭފުޅަކަށް މިއަހަރު ލިބިވަޑައިގަންނަވައެވެ. އިނާމަށް ބޭފުޅުން ހޮއްވެވުމުގެ މަސައްކަތް ކުރިއަށް ގެންދެވީ، ހާއްސަ އިނާމާބެހޭ ކޮމިޓީންނެވެ.

މީގެއިތުރުން ދައުލަތަށް ހިދުމަތްކުރުމުގެ އިނާމު ވެސް މި ޖަލްސާގައި، 53 ބޭފުޅަކަށް ދެއްވިއެވެ. މި އިނާމަށް ބޭފުޅުން ހޮއްވަވަނީ، ގައުމީ އިނާމާބެހޭ ކޮމިޓީންނެވެ.