ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެމްބަރު އަލީ ހަމީދުގެ ތަހުގީގު އަވަސްކުުރުމަށް ޕީޖީ އޮފީހުން ފުލުހުންނަށް އަންގައިފިއެވެ.

މިއީ ޢަލީ ޙަމީދުގެ މަސްލަހަތު އޮންނަ ކުންފުންޏެއް ކަމަށްވާ ނޯތު ކޯސްޓް ކޮންސްޓްރަކްޝަން ޕްރައިވެޓް ލިމިޓެޑަށް ހަވާލުކޮށްފައިވާ ޕްރޮޖެކްޓަކާ ގުޅިގެން، 2023 ވަނަ އަހަރު 44 މިލިއަން ރުފިޔާދައުލަތުން ދޫކޮށްފައިވާ މައްސަލައެކެވެ.

އެ ޕްރޮޖެކްޓު އެ ކުންފުންޏާ ހަވާލުކުރިނަމަވެސް މިހައިތަނަށް ވެސް އެ މަސައްކަތް ކުރިއަށް ގެންގޮސްފައިނުވާކަމަށް މަޖިލީހުގެ މާލިއްޔަތު ކޮމިޓީން ވަނީ ވިދާޅުވެފައެވެ. އެހެންކަމުން އެ މައްސަލަ ކޮމިޓިން ވަނީ ކަމާގުޅުންހުރި އިދާރާތަކުގެ ސަމާލުކަމަށް ގެނެސްފައެވެ.

ޕީޖީ އޮފީހުން ވިދާޅުވީ މިއީ ދިވެހި ދައުލަތާއި ރައްޔިތުންގެ އާންމު މަސްލަހަތު މަތީ ދަރަޖައަކަށް އޮތް ހައްސާސް މައްސަލައެއް ކަމަށެވެ. އަދި މި މައްސަލައަށް އިތުރު ސަމާލުކަމެއް ދެއްވައި، މައްސަލައަށް ހާއްސަ ތަހްގީގު ޓީމެއް އެކުލަވާލައި، އަވަސް މައްސަލައެއްގެ ގޮތުގައި ކުރިއަށް ގެންދެވުމަށް ފުލުހުންނަށް ވަނީ އަންގާާފައެވެ.

މީގެއިތުރުން މި މައްސަލައިގައި ހިމެނޭ ފަރާތްތަކާ ގުޅޭ މި ބާވަތުގެ އިތުރު ޕްރޮޖެކްޓެއްވާނަމަ އެކަންކަން ވެސް މި މައްސަލައިގެ ތެރެއިން ތަހްގީގުކުރެއްވުމަށް ފުލުހުންނަށް އަންގާފައިވާނެ ކަމަށް ޕީޖީ އޮފީހުން ވިދާޅުވެއެވެ.