ދެކުނު އޭޝިއާ ސަރަހައްދުގެ އެންމެ ބާރު ގަދަ ޕާސްޕޯޓުގެ މަގާމު ރާއްޖެއިން ދަމަހައްޓައިފިއެވެ.

މިއީ ރާއްޖެއިން މި މަގާމު ޖެހިޖެހިގެން ދެމެހެއްޓި 6 ވަނަ އަހަރެވެ.

ހެންލީ އެންޑް ޕާޓްނަރސް އިން ބަލަހައްޓަމުންދާ 199 ޕާސްޕޯޓުގެ ތެރެއިން ދިވެހި ޕާސްޕޯޓު ހިމެނިފައިވަނީ ރޭންކިންގ ގެ 53 ވަނައިގައެވެ. ފައިބެއަހަރު ނިމުނުއިރު ރާއްޖެ އޮތީ މިލިސްޓުގެ 57 ވަނައިގައެވެ.

ދިވެހި ޕާސްޕޯޓުގައި ދުނިޔޭގެ 94 ގައުމަކަށް ވިޒާއާއި ނުލާ ދަތުރުކުރެވެއެވެ.

އަވަށްޓެރި އިންޑިއާ އޮތީ މިލިސްޓުގެ 85 ވަނައިގައެވެ. އަދި ސްރީލަންކާ އޮތީ 96 ވަނައިގައެވެ.

ހެންލީ ޕާސްޕޯޓު އިންޑެކްސްގައި އެންމެ ބާރުގަދަ ޕާސްޕޯޓުގެ މަގާމު ދަމަހައްޓާފައިވަނީ ވިޒާއާ ނުލާ 195 ގައުމަކަށް ދަތުރުކުރެވޭ ސިންގަޕޫރުގެ ޕާސްޕޯޓެވެ. ހެންލީ އެންޑް ޕާޓްނަރސްއިން، ހެންލީ ޕާސްޕޯޓު އިންޑެކްސް ލިސްޓު އާންމު ކުރަނީ އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން، އައިއޭޓީއޭގެ މައުލޫމާތުތަކަށް ބިނާކޮށްގެންނެވެ.