ހައުސިންގ މިނިސްޓްރީގެ ސަރވާ ސަލާމަތްކުރެވޭތޯ ރާއްޖެއިން ބޭރަށް ފޮނުވާފައިވާ ކަމަށް ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމަނިކުފާނު ވިދާޅުވީ މ. ގްރީން ބިލްޑިންގ ގައި ހިނގި ބޮޑު އަލިފާނުގެ ހާދިސާގައި އަނދައިގެން ދިޔަ ހައުސިންގ މިނިސްޓްރީގެ ސަރވާ ފޮނުވީ ސިންގަޕޫރަށް ކަމަށެވެ.

މީގެއިތުރުން މިނިސްޓަރު ވަނީ މި ހާދިސާ ހިނގީ އުމަރު ޒާހިރު އޮފީސް ބިލްޑިންގގައި ބެކައަޕް ސަރވާތައް ބެހެއްޓުމުގެ މަޝްރޫއު ނިމެން ކައިރިވެފައިވަނިކޮށްކަން ފާހަގަކުރައްވާފައެވެ.

ކުރީގެ ހައުސިންގ މިނިސްޓަރު ޑރ. އަލީ ހައިދަރު ކުރިންވިދާޅުވެފައިވަނީ މިނިސްޓްރީގެ ސަރވާގައި ރައްކާކޮށްފައި ހުރީ މުވައްޒަފުންގެ އެންމެހައި މައުލޫމާތުތަކާއި އެކިއެކި މަޝްރޫއުތަކުގެ މުހިންމު ލިޔެކިޔުންތައް ކަމަށެވެ.