ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ފްލެޓު ލިސްޓު ރަމަޟާން މަހުގެ ކުރިއަށް އިއުލާން ކުރައްވާނެކަމަށް ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ރައީސުލްޖުމްޖޫރިއްޔާގެ އޮފީހުގައި ޖަނަވަރީ 14 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މައުލޫމާތު ހިއްސާކުރައްވާފައިވަނީ ނިމިދިޔަ އެމްޑީޕީ ސަރުކާރުން އިއުލާންކޮށްފައިވާ ގެދޮރުވެރިޔާ މަޝްރޫއުގެ ދަށުން ދޫކުރުމަށް ހަމަޖެހިފައިވާ 4000 ފްލެޓު ލިބޭ މީހުންގެ ލިސްޓާއި ގުޅޭގޮތުންނެވެ.

މިނިސްޓަރު ވިދާޅުވީ އެ ސްކީމުގެދަށުން ފޯމު ހުށައެޅި ފަރާތްތަކުގެ އިތުރު އިވެލުއޭޝަނެއް ނުހަދާނެ ކަމަށެވެ. އަދި އޭގެބަދަލުގައި ކުރާނީ ލިސްޓުގައި ހިމެނޭ ފަރާތްތަކުގެ މައުލޫމާތުގެ ސައްހަކަން ކަށަވަރުކުރުމުގެ މަސައްކަތް ކަމަށް ވިދާޅުވިއެވެ.

"މިގޮތަށް ޢަމަލުކުރުމަށް ނިންމީ ގިނަ ރައްޔިތުންތަކެއްގެ ކަންބޮޑުވުން ހުރުމާއެކު ފްލެޓް ލިސްޓު ވީހާވެސް އަވަހަށް އާއްމުކުރަން."

މިނިސްޓަރު ވަނީ މިކަން އަވަސްކުރުމަށް ސަރުކާރުން މިހާރު ނިންމާފައިވަނީ 2023 ވަނަ އަހަރުގެ ނޮވެމްބަރ 15 ގައި ގެޒެޓްކުރެވިފައިވާ ފަރާތްތަކުގެ ލިސްޓުގެ ވެރިފިކޭޝަން ޕްރޮސެސްއެއް ކުރިއަށްގެންދިޔުމަށްކަން ފާހަގަކުރެއްވިއެވެ. އަދި މިވެރިފިކޭޝަން ޕްރޮސެސް ކުރިއަށްގެންދާއިރު ބަލާނީ 26 ޖޫން 2022 ހުގައި ގެޒެޓްކޮށްފައިވާ ގެދޮރުވެރިޔާ ސްކީމްގެ ދަށުން ފްލެޓް ދޫކުރާ އުސޫލުގެ ދަށުން އަދި ފޯމު ހުށައެޅުމަށް އެކުލަވާލާފައިވާ، ގެދޮރުވެރިން ޕޯޓަލްގައި އިރުޝާދު ދީފައިވާ ގޮތަށްކަމަށް ވެސް ވިދާޅުވިއެވެ.

ގެދޮރުވެރިޔާ ސްކީމްގެ ދަށުން ދޫކޮށްފައިވާ ފްލެޓު ލިސްޓު އާންމުކުރުމަށް ސަރުކާރުން މިވީ އެއްއަހަރުގެ ތެރޭގައި މަސައްކަތްކުރައްވާފައިވީނަމަވެސް މިކަން ދިގުލައިގެންދާތީވެ، މިނިސްޓަރ ޑރ. ޢަބްދުﷲ މުއްޠަލިބު ވަނީ ރައްޔިތުންގެ ކިބައިން މައާފަށް އެދިވަޑައިގަންނަވާފައެވެ.