މަސްޖިދުލް ތަޤްވާ މިސްކިތް ޒީނަތްތެރި ކުރުމަށް މާލޭ ސިޓީ ކައުންސިލުން ނިންމައިފިއެވެ.

އެ ކައުންސިލުން މިގޮތަށް ނިންމާފައިވަނީ މޭޔަރ އާދަމް އާޒިމް ޖަނަވަރީ 13 ވަނަ ދުވަހު އެމިސްކިތަށް ޒިޔާރަތް ކުރައްވާ، މިސްކިތް ބައްލަވާ ލެއްވުމަށްފަހުއެވެ.

މޭޔަރ ވިދާޅުވީ މިސްކިތުގެ ނަމާދު ކުރާބައިގައި އޭސީކޮށް، މިސްކިތުގެ ގޯތިތެރޭގައި ޒަމާނާ އެއްގޮތަށް ގައު އަތުރާނެ ކަމަށެވެ. އަދި ވުޟޫކުރާބައިގެ ހިޔާކޮށްފައިވާ ސަރަހައްދު ބޮޑުކުރުމަށް ވެސް ނިންމާފައިވާ ކަމަށެވެ.

މީގެއިތުރުން އިތުރު ފާޚާނާއެއް ވެސް ހަދާނެ ކަަމަށް މޭޔަރު ވިދާޅުވިއެވެ. އަދި މިސްކިތު ތެރޭގައި ހަރުކުރާ އޭސީ ހަދިޔާ ކޮށްދެއްވީ ހަނިމާދޫ ދާއިރާގެ މެމްބަރ އަބްދުލްޣަފޫރު މޫސާ ކަމަށް ވެސް ވިދާޅުވިއެވެ.

ދިވެހިބަހާއި ސަގާފަތާ ތަރިކައާ ބެހޭ ވުޒާރާއިން ހިމާޔާތްކޮށްފައިވާ ތަޤްވާ މިސްކިތުގެ މަސައްކަތްތައް ކުރިއަށް އޮތް ރަމަޟާން މަހަށް ނިންމުމަށް މޭޔަރ ވަނީ ވިދާޅުވެފައެވެ.

މިއީ ހަތް ސަތޭކަ އަހަރަށް ވުރެ ގިނަ ދުވަސް ވެފައިވާ މިސްކިތެކެވެ.