ވެރިކަމަކީ އެއްވެސް ޙާލެއްގައި ލިބޭ މާބޮޑު މޮޅެއް ނޫންކަމަށާއި އެއީ ލިބޭ މުދާ ގަނޑެއް ވެސް ނޫންކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ގައުމާއި މުހާތަބްކުރައްވާ ދެއްކެވި ވާހަކަފުޅުގައެވެ.

އެމަނިކުފާނު ވަނީ ވެރިކަމާއި ހަވާލުވެވަޑައިގަތުމަށްފަހު މިވީ އެއް އަހަރެއްހާ ދުވަހުގެ ތެރޭގައި މަސައްކަތްކުރެއްވީ ރައްޔިތުންގެ ފަޅީގައި ހުރެގެން، ރައްޔިތުންގެ ފަރާތުން ހެޔޮވެރިކަމެއްކުރުމަށްކަމަށް ވަނީ ވިދާޅުވެފައެވެ.

އެގޮތުން މީގެކުރީ ސަރުކާރުތަކުން އަޅާނުލާ ހުރި ބޮޑެތި މައްސަލަތައް ހައްލުކުރުމަށް މަސައްކަތްކުރައްވަނީ ވެސް ރައްޔިތުންނަށްޓަކައިކަން ފާހަގަކުރެއްވިއެވެ.

މީގެއިތުރުން ވެރިކަމާއި ހަވާލުވެވަޑައިގަންނަވަމުން ވެވަޑައިގެންނެވި ވައުދުތައް ފުއްދެވުމަށް މަސައްކަތްކުރައްވަމުން ގެންދަވާކަން ހާމަކުރައްވައި، އެގޮތުން ސިޔާސީގޮތުން މީހުންނަށް އަދަބު ދިނުމާއި ޖުޑީޝަރީއަށް ނުފޫޒު ނުފޯރުވާނޭކަމަށް ވިދާޅުވެ، ވެވަޑައިގެންނެވި ވައުދުގެ މަތީގައި ހުންނެވިކަން އެމަނިކުފާނު ވިދާޅުވިއެވެ.

ހަމަމިއާއެކު ދިފާއީގޮތުންނާއި ޚާރިޖީގޮތުން ގައުމު ވަރުގަދަކުރެއްވުމަށް ވެވަޑައިގެންނެވި ވައުދު ފުއްދެވުމަށް ކުރައްވާ މަސައްކަތްތަކުގެ މައްޗަށް ވެސް ރައިސްގެ ވާހަކަފުޅުގައި އަލިއަޅުއްވާލެއްވިއެވެ.

ރައީސް ވަނީ ވެރިކަމާއި ވެރިންގެ މަސްއޫލިއްޔަތާ ގުޅޭގޮތުން އެމަނިކުފާނުގެ ބައްޕާފުޅު އަލްމަރުހޫމް އައްޝައިހް ހުސައިން އަބްދުއްރަޙްމާނު ލިޔުއްވާފައިވާ "ދައުލަތާއި ވެރިންނާއި މަސްއޫލިއްޔަތުގެ މަފުހޫމް" ފޮތަށް ވެސް އަލިއަޅުވައިލައްވާފައެވެ.

އެއީ ވެރިންނަށް އިންތިހާބުކުރުމުގައި ބަލަންވީ ކަންކަން އޮޅުންފިލުވުމަށް ކިޔާލަން މުހިންމު ފޮތެއްކަމަށް ވެސް ވިދާޅުވިއެވެ.