އެންވަޔަރްމެންޓް މިނިސްޓަރ ޠޯރިޤް އިބްރާހިމް އަޒަރްބައިޖާން އަށް ފުރާވަޑައިގެންފިއެވެ.

މިއީ ތިމާވެށީގެ އެންމެ ބޮޑު ބައްދަލުވުން ކަމުގައިވާ "ކޮޕް 29" ގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.

އަޒަރުބައިޖާންގެ ވެރިރަށް ބާކޫއަށް އެމަނިކުފާނުގެ އަރިހުގައި އެ މިނިސްޓްރީގެ އިސްވެރިންގެ ޓީމެއް ބައިވެރިވެވަޑައިގަންނަވައެވެ.

މިފަހަރުގެ ކޮޕް ސަމިޓުގައި ރާއްޖޭން މުހިންމު ދައުރެއް އަދާކުރާނެކަމަށް މިނިސްޓަރު ވަނީ ވިދާޅުވެފައެވެ.

ކޮޕްގެ ހަވާސާގައި 4 އިވެންޓެއް ރާއްޖޭން އިންތިޒާމުކުރުމަށްވަނީ ހަމަޖެހިފައެވެ. އޭގެތެރޭގައި އޭޑީބީއާ ގުޅިގެން އިއާދަކުރަނިވި ހަކަތައާ ގުޅޭ އިވެންޓަކާއި، ކޮޕްގެ އެޓޯލްސް ނޭޝަންގެ ޗެއަރގެ ހައިސިއްޔަތުން ފަރުތައް ހިމާޔަތްކުރުމުގެ މުހިންމުކަމާ ގުޅޭގޮތުން "ސަސްޓެއިނަބަލް ކޮރަލް ރީފް މެނޭޖްމަންޓް" ގެ އިތުރުން ކުދި ޖަޒީރާ ޤައުމުތަކުގެ ކްލައިމެޓް އެޑަޕްޓޭޝަން މިނިސްޓީރިއަލް ޗެމްޕިއަނެއްގެ ގޮތުގައި ހަރަކާތެއްހިމެނެއެވެ.

ކޮޕަށް ދިއުމުގެ ކުރިން، ތިމާވެއްޓާ ގުޅޭ މައްސަލަތަކާއި ގުޅޭގޮތުން ޒުވާނުންގެ ޚިޔާލު ހޯދުމަށް ހާއްސަ އިވެންޓެއްވަނީ ކުރިއަށް ގެންގޮސްފައެވެ. އެޚިޔާލުތަކަށް ބިނާކޮށް، ކޮޕަށް ގެންދިއުމަށް ރާއްޖޭގެ ޒުވާނުންގެ ފަރާތުން ހާއްސަ ސްޓޭޓްމަންޓެއް ވަނީ ތައްޔާރުކޮށްފައެވެ.

ކޮޕް 29 ގައި ރައީސް ޑރ. މުޙައްމަދު މުޢިއްޒު ބައިވެރިވެވަޑައިގެން ތަގްރީރު ކުރެއްވުމަށްވަނީ ހަމަޖެހިފައެވެ.

މިމަހުގެ 11 އިން 22 ގެ ނިޔަލަށް އަޒަރުބައިޖަންގެ ވެރިރަށް ބާކޫގައި ކުރިއަށްދާ މިއަހަރު ކޮޕްގެ ޝިޢާރަކީ "އިން ސޮލިޑޭރިޓީ ފޯރ އަ ގްރީން ވޯލްޑް" މިއެވެ.