ޖުމްހޫރިއްޔަތެއް ބަލައިގަތުމުގެ މާނައަކީ ރައްޔިތުންނާއި ގައުމުގެ ތަރައްގީ ނިންމުމުގައި ރައްޔިތުންގެ ހިއްސާއާ ބައިވެރިވުން އޮތުން ކަމުގައި ދިވެހި ބަހާއި ސަޤާފަތާއި ތަރިކައާ ބެހޭ ވޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ.

ނޮވެމްބަރ 10 ވަނަ ދުވަހުގެ ރޭ ދަރުބާރުގޭގައި ބޭއްވި މި ޖަލްސާގައި އެމަނިކުފާނު ވަނީ 20 ވަނަ ގަރުނުގައި ޖުމްހޫރިއްޔަތެއް ގެނައުމަށް ދިވެހިން ދެކުނު ހުވަފެން ހަގީގަތަކަށްވާތަން ފެންނަން ފަށާފައިމިވަނީ މިއަދުކަމަށް ވިދާޅުވެފައެވެ.

އެގޮތުން ރައީސް ޑރ. މުޙައްމަދު މުޢިއްޒުގެ ހިތްޕުޅުގައި ދިވެހި ގައުމާއި ދިވެހިންނާ މެދު ދެކެވަޑައިގަންނަވާ ގޮތް ސާފުކޮށް ރައްޔިތުންނަށް ހުށައެޅުއްވުމުން، ވެރިކަމުގެ އަމާނާތް އިތުބާރާއެކު ރައީސްއަށް ހަވާލުކުރެއްވިކަން ފާހަގަކުރެއްވިއެވެ.

ވެރިކަން ހަވާލުކުރެއްވުމުގެ ކުރިންވެސް އެމަނިކުފާނު ވިދާޅުވަމުން ގެންދެވީ ރައްޔިތުންގެ ފަޅީގައި އަބަދުވެސް ހުންނަވާނެކަން ކަމަށާއި ވެރިކަން ކުރައްވަން ބޭނުންވަނީ ގައުމުގެ ހުރިހާ ފަށަލަތަކެއް ޝާމިލްވާ ގޮތަށްކަން ފާހަގަކުރެއްވިއެވެ.

މީގެއިތުރުން ރައީސް އޭރު ވިދާޅުވި ވައުދުފުޅުތައް ފުއްދެވުމުގެ މަސައްކަތްތައް ކުރައްވަމުން ގެންދަވާކަން ފާހަގަކުރައްވައި މިނިސްޓަރު ވަނީ ކުރިއަށްއޮތް 20 އަހަރުދުވަހުގެ ގައުމީ ތަރައްގީ އާ ގުޅޭ ޕްލޭން ތައްޔާރުކުރުމުގެ މަސައްކަތް ފަށާފައިވާކަން ފާހަގަކުރައްވާފައެވެ.

މިނިސްޓަރު ވިދާޅުވީ މި ޕްލޭން ފުރިހަމަވެގެން އަންނައިރު، ހުރިހާ ރައްޔިތުންގެ ޚިޔާލުތައް އެ ޕްލޭންގައި އޮތުމަކީ ރައީސް ބޭނުންފުޅުވާގޮތްކަމަށެވެ. އަދި އެކަމަށް ފުރުސަތުތައް ހުޅުވާލައްވާފައިވާކަން ވެސް ފާހަގަކުރެއްވިއެވެ.