ދިވެހި ސަރުކާރުގެ ސިޔާސަތު ބިނާވާންވާނީ ދިވެހި ރައްޔިތުންނަށް އެންމެ މަސްލަހަތު ހުންނާނެ ގޮތުގެ މައްޗަށް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުން އެ މަނިކުފާނު ވަނީ ސަރުކާރުގައި އެންމެ އިސްކަމެއް ދެއްވާނީ ގައުމުގެ މިނިވަންކަން ހިމާޔަތް ކުރުމަށް ވިދާޅުވެފައެވެ.

"އަދި ގައުމުގެ އަމިއްލަވަންތަކަން ޔަގީންކުރުމަށް، އަޅުގަނޑުމެންގެ ގައުމު އިސްކޮށްގެން ދިވެހީންނަށް އެންމެ ރަނގަޅު ގޮތް ހޯދައިދިނުމުގެ ޚާރިޖީ ސިޔާސަތެއްގެ މައްޗަށް ބިނާކޮށް، އެ މަގުގައި ކުރިއަށް ދިއުމަށް." ރައީސް ވިދާޅުވިއެވެ.

މީގެއިތުރުން މި ސަރުކާރުން ގައުމުތަކާއެކު ރަހުމަތްތެރިކަން ބާއްވާނެކަމަށާއި ހަތުރުވެރިކަމެއް، ހަސަދަވެރިކަމެއް ނުބާއްވާނެ ކަމުގައި ފާހަގަކުރެއްވިއެވެ. އަދި އަވަށްޓެރިންނާއި ދުރު ހިސާބުތަކުގެ ގައުމުތަކަށް ވެސް ދިވެހި ދައުލަތުން އިހުތިރާމު ކުރާ ފަދައިން އެ ގައުމުތަކުން ވެސް ހަމައެގޮތަށް ދިވެހި ދައުލަތަށް ވެސް އެ ހައްގު އޮންނަންވާނެ ކަމުގައި ފާހަގަކުރެއްވިއެވެ.

ރައީސްގެ ވާހަކަފުޅުގައި، ދިވެހި ގައުމަށް ވަފާތެރިވުމަށްވުރެ ބޮޑު އުފަލެއް އެ މަނިކުފާނުގެ ނެތް ކަމަށާއި އެ ގޮތުން މި ވޭތުވެދިޔަ ފަންސާސް އެއް ހަފުތާއާ ދެ ދުވަހު އެކަން ދިވެހިރައްޔިތުންނަށް ފަހުރުވެރިކަމާއެކު ކަށަވަރުކޮށްދެއްވާފައިވާނެ ކަމުގައި ވިދާޅުވިއެވެ.

އެގޮތުން މި ހިނގާ އަހަރުގެ ދިހައެއް މޭގައި މިރާއްޖޭގައި ތިބި ބޭރުގެ ސިފައިން ހިމޭން ރީތި މިންގަނޑުތަކުން މަޝްވަރާކޮށްގެން، ޑިޕްލޮމަސީގެ ރިވެތި އުސޫލުން ކުރެވުނު މަޝްވަރާއިން، މި ގައުމުގައި ތިބި ބޭރުގެ ހުރިހާ ސިފައިން މި ގައުމުން ބޭލިފައިވާކަން އެ މަނިކުފާނު ފާހަގަކުރެއްވިއެވެ.