ރާއްޖޭގެ އެމްބަސީއެއް އިޓަލީގައި ހުޅުވުމުގެ މަސައްކަތް ކުރިއަށްދާކަަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޖުމްހޫރީ ދުވަހުގެ ހާއްސަ ޖަލްސާގައި ވާހަކަފުޅުދައްކަވަމުންނެވެ.

މިސަރުކާރުގެ އަމާޒަކީ ހުރިހައި ގައުމަކާއެކު ވެސް ގާތް ގުޅުމެއް ބާއްވައި ޚާރިޖީ ގުޅުން ވަރުގަދަކުރެއްވުންކަން ހާމަކުރައްވައި ރައީސް ވިދާޅުވީ ބޭރުގެ ގައުމުތަކުގައި އެމްބަސީތައް ހުޅުވުމުގެ މަސައްކަތް ކުރައްވަމުން ގެންދަވާކަމަށެވެ.

އެމަނިކުފާނު ވަނީ އިޓަލީވިލާތުގައި ރާއްޖޭގެ އެމްބަސީއެއް ހުޅުވުމަށް މިހާރު ހުއްދަ ލިބިފައިވާ ކަމަށާއި އެހެންވެ، އެ ގައުމުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވަމުން ގެންދަވާކަމަށް ވިދާޅުވިއެވެ.

މީގެއިތުރުން އެގައުމުގައި އެމްބަސީއެއް ހުޅުވުމަށް ނިންމީ ޓޫރިޒަމަށް ވަރަށް މުހިންމު ވީމައި ކަމަށް ވެސް ވިދާޅުވިއެވެ.

ރާއްޖެއަށް ފަތުރުވެރިން އަންނަގައުމުތަކުގެ ތެރެއިން އިޓަލީ އަކީ ފުރަތަމަ 10 ގައުމުގެ ތެރޭގައި ހިމެނޭ ގައުމެކެވެ. އެގޮތުން އެ ގައުމުން މިހާތަނަށް ރާއްޖެއަށް 116،195 ފަތުރުވެރިން އައިސްފައިވާކަމަށް ތަފާސްހިސާބުން ދައްކައެވެ.