ސިޔާސީ އިދިކޮޅު އެންމެބޮޑު ޕާޓީ، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ޖަލްސާއެއް މި މަހު 12 ވަނަ ދުވހުގެ ރޭ ބޭއްވުމަށް ނިންމައިފިއެވެ.

މީސްމީޑިއާގެ 'އެކްސް' ގައި ކޮށްފައިވާ ޕޯސްޓެއްގައި ވަނީ ޖަލްސާ އޮންނާނީ މާދަމާ ރޭ 8:30 ގައި އާޓިފިޝަލް ބީޗް ސަރަހައްދުގައި ކަމަށެވެ. އަދި އެ ޖަލްސާގައި ބައިވެރިވުމަށް ހުރިހައި ފަރާތްތަކަށް ވަނީ ދައުވަތު އަރުވާފައެވެ.

އެހެންނަމަވެސް އެ ޖަލްސާގެ އެޖެންޑާ އަދިހާމަކޮށްފައެއް ނުވެއެވެ.

އެ ޕާޓީން މި ޖަލްސާ ބޭއްވުމަށް ނިންމާފައި މިވަނީ، ސީދާ ހަރަކާތަށް ނިކުންނަން އެ ޕާޓީގެ ގައުމީ މަޖިލިހުން މިދިޔަ އޮގަސްޓު މަހު ގަރާރެއް ފާސްކޮށްފައިވާ ވަނިކޮށްނެވެ.

އެމްޑީޕީން ވަނީ ސަރުކާރުން ނިޒާމުތަކަށް ގެންނަން މަސައްކަތްކުރާ ބަދަލުތައް ކަމުނުދާ ކަމަށާއި އެއްވެސް އިންސާފެއް ނެތި ވަޒީފާއިން މީހުން ވަކިކުރަމުންދާ ކަމަށް ވެސް އެމްޑީޕީން ބުނެފައެވެ. އަދި ބޯހިޔާވަހިކަމާއި ގާނޫނުތަކަށް ގެންނަން ހުށަހަޅާފައިވާ އިސްލާހުތަކާ ގުޅިގެން ކަންބޮޑުވުން ފާޅުކޮށް އެ ޕާޓީން ވެސް ވަނީ އަޑުއުފުލާފައެވެ.

ލާމަރުކަޒީ ނިޒާމަށް އަސަރުކުރާ ގޮތަށް އަދި މިނިވަން މުއައްސަސާތަކަށް ރައީސްގެ ބާރު ފޯރުވޭހެން މަސައްކަތް ކުރަމުންދާ ކަމަށް ބުނެ އެކަމާ ދެކޮޅަށް އަޑުއުފުލުމުގެ ގޮތުން ރައްޔިތުންގެ މަޖިލިސް ސަރަހައްދަށް އެ ޕާޓީއަށް ތާއީދުކުރާ ފަރާތްތަކުން އެއްވެ މިފަހުން ވަނީ މުޒާހަރާކޮށްފައެވެ.