ހއ. ހޯރަފުށީގައި މޫދު ކަސްރަތު ޕްރޮގްރާމެއް ފަށައިފިއެވެ.

މިއީ އެމްއެންޑީއެފް ނޮދަން އޭރިއާ ކޮމާންޑުން އެރަށު ޕޮލިސް ސްޓޭޝަނާއި އެ ރަށުގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީ ގުޅިގެން ފެށި ޕްރޮގްރާމެކެވެ.

މި ނޮވެމްބަރ މަހުގެ 10 ވަނަ ދުވަހުން ފެށިގެން 21 ދުވަހުގެ މުއްދަތަށް އެރަށުގައި ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމްގައި އެ ރަށުގެ 61 އަންހެނުންނާއި ފަސް ފިރިހެން ވަނީ ބައިވެރިވެފައެވެ.

ރައްޔިތުންނަށް ބޭނުންވާ ދުޅަހެޔޮކަމާއި، ދުޅަހެޔޮ ސިއްހަތާއި، ރައްޔިތުން ބާރުވެރިކުރުމަށް ހިންގާ މި ޕްރޮގްރާމުގައި އިޖުތިމާއީ ފޭރާން ވަރުގަދަ ކުރުމާއި އެއްބަޔަކު އަނެއް ބަޔަކަށް އިހުތިރާމްކުރާ، އެކުވެރިކަމާ އެކު ގުޅިގެން މަސައްކަތް ކުރާ އެއްބައެއްވަންތަ މުޖުތަމައެއް ގާއިމުކުރުމުގެ މަގްސަދުގައި ކުރިއަށް ގެންދާ ޕްރޮގްރާމެކެވެ.

މި ޕްރޮގްރާމްގައި މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ނޮދަން އޭރިއާ ކޮމާންޑްގެ މުދައްރިބުންނެވެ.