ސަރުކާރުން އަންނައަހަރަށް ލަފާކުރައްވައި، ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓް ބަހުސް ރައްޔިތުންގެ މަޖިލީހުގެ މާދަމާގެ ޖަލްސާ އަށް އެޖެންޑާކޮށްފިއެވެ.

56.6 ބިލިއަން ރުފިޔާގެ ބަޖެޓެއް ސަރުކާރުން ރައްޔިތުންގެ މަޖިލީހަށް ހުށަހެޅުއްވީ މިދިޔަ އޮކްޓޫބަރު މަހުގެ 31 ވަނަ ދުވަހުއެވެ.

އެދުވަހުގެ ޖަލްސާގައި ފިނޭންސް މިނިސްޓަރު މޫސާ ޒަމީރު ބަޖެޓް ހުށަހެޅުއްވުމުން، ދިރާސާކުރުމަށް ކޮމިޓީއަށް ވަނީ ފޮނުވާފައެވެ.

އެހެންނަމަވެސް ބަޖެޓް ފޮތް ނުލިބޭ މައްސަލައިގައި، އިދިކޮޅު އެމްޑީޕީ މެންބަރުން ކަންބޮޑުވުން ފާޅުކޮށްފައިވާއިރު، މަޖިލީހުގައި ބަޖެޓަށް ވާހަކަ ދެއްކޭނީ އެކަމާބެހޭ ތަފްސީލުތައް ލިބިގެން ކަމަށް އެ ޕާޓީން ވަނީ ބުނެފައެވެ.

އެކަމާއިގުޅިގެން ސަރުކާރަށް ނިސްބަތްވާ މެމްބަރުން ވިދާޅުވަމުން ގެންދަވަނީ ބަޖެޓް ބަހުސް ފަށާއިރު ބަޖެޓް ފޮތް ލިބޭނެ ކަމަށެވެ.

ރައްޔިތުންގެ މަޖިލީހުގެ އާންމު ކޮމެޓީން ނިންމާފައިވަނީ ބަޖެޓާއި ގުޅިގެން މަޖިލީހުގެ ކޮންމެ މެންބަރަކަށް 15 މިނެޓުގެ ފުރުސަތެއް ވާހަކަދެއްކެވުމަށް ދިނުމަށެވެ.

ބަޖެޓުގެ ބަހުސް ހިނގަމުންދާ ވަގުތު މެންބަރުން ފާހަގަކުރައްވާ ނުކުތާތަކަށް ޖަވާބުދެއްވުމަށް ރައްޔިތުންގެ މަޖިލީހުގެ ރައީސް ކަނޑައަޅުއްވާ ގޮތެއްގެ މަތީން ފިނޭންސް މިނިސްޓަރަށް ޖުމްލަ 45 މިނެޓުގެ ވަގުތެއް ދޭން ވެސް ކޮމިޓީން ނިންމާފައި ވެއެވެ.

މީގެއިތުރުން ބަޖެޓް ކޮމެޓީން ބަޖެޓް ދިރާސާކޮށް މަޖިލިސް ތަޅުމަށް ހުށަހަޅާ ކޮމެޓީ ރިޕޯޓަށް ބަހުސްކުރާ މަރުހަލާގައި ކޮންމެ މެންބަރަކަށް ހަތް މިނެޓުގެ އެއް ފުރުސަތު ދިނުމަށް ވެސް ކޮމެޓީން ވަނީ ފާސްކޮށްފައެވެ.