އޭޝިއަން ޑިވެލޮޕްމެންޓް ބޭންކް (އޭޑީބީ) އިން ރާއްޖެއަށް 21 މިލިއަން ޑޮލަރު ދިނުމަށް ނިންމައިފިއެވެ.

އޭޑީބީން ހާމަކޮށްފައިވާ ގޮތުގައި މޫސުމީ ބަދަލުތަކާ ދެކޮޅަށް ކުރާ މަސައްކަތާއި ކާނާގެ ރައްކާތެރިކަމަށް ކުރާ މަސައްކަތަށް ދީފައިވާ މި އެހީގެ ތެރެއިން ހަތަރު މިލިއަން ޑޮލަރަކީ ރާއްޖެއަށް ދޭން ނިންމާފައިވާ ލުއި ލޯނެކެވެ.

މީގެއިތުރުން 17.95 މިލިއަން ޑޮލަރަކީ އެންމެ ފަގީރު އަދި ތަރައްގީވަމުން އަންނަ ގައުމުތަކަށް ދޭ ހިލޭ އެހީގެ ދަށުން ދޭ ފައިސާކަމަށް ވަނީ ބުނެފައެވެ.

މި ފައިސާގެ އެހީގައި އައްޑޫ ސިޓީ އާއި ހއ. އަތޮޅުގައި ކްލައިމެޓް ސްމާޓް އާބަން ފާމިން ޓެކްނޮލޮޖީ ތައާރަފު ކުރުމަށް ވަނީ ހަމަޖެހިފައެވެ. އަދި ހަނިމާދޫ އެގްރިކަލްޗަރ ސެންޓަރުގައި ދިރާސާ ކުރާނެ މަލްޓިޕަރޕަސް ފެސިލިޓީއެއް ބިނާކުރުމުގެ މަސައްކަތް ވެސް މި ފައިސާއިން ކުރުމަށް ނިންމާފައި ވެއެވެ.

ހަމަމިއާއެކު އައްޑޫ އާއި މާލޭގެ މޫސުމީ އަރލީ ވާނިންގ ސިސްޓަމް އަޕްގްރޭޑްކުރުމަށް ވަނީ ނިންމާފައެވެ. އަދި ކުޅުދުއްފުށި ސިޓީގައި ފެން ބޮޑުވުމުގެ މައްސަލަ ހައްލުކުރުމަށް ފެން ހިންދާ އަދި ފިލްޓަރޭޝަން ނިޒާމެއް ގާއިމްކުރުމަށް ވެސް ނިންމާފައި ވެއެވެ.

މީގެއިތުރުން މި ފައިސާ އިން ކަނޑޫފާ ސަރަހައްދު އާލާކޮށް ގުދުރަތީ ވެށި ހިމާޔަތްކުރުމުގެ މަސައްކަތް ކުރުމަށް ވެސް ވަނީ ހަމަޖައްސާފައެވެ.