މި ސަރުކާރަށް ތަންމިނަށް ފުރުސަތު ދީގެން ތިބެވިއްޖެ ކަމަށާއި ނަމަވެސް ގައުމުގެ އިގްތިސާދާއި މުޅި ގައުމު މިހާރު ފުނޑިފައިވާ ކަމަށް އެމްޑީޕީގެ ޗެއަރޕާރސަން އަލްއުސްތާޛު ފައްޔާޟު ފައިސަލް ވިދާޅުވެއްޖެއެވެ.

އެމްޑީޕީ އިން ބޭއްވި ޖަލްސާގައި ވާހަކަ ދައްކަވަމުން އޭނާ ވިދާޅުވީ މިއީ ބީރު ސަރުކާރެއް ކަމަށާއި ކަންކަން އަޑު އިވެނީ ވަރަށް ބާރަށް ބުނެގެން ކަމަށެވެ.

މީގެއިތުރުން މި ސަރުކާރުން ވޯޓް އޮޅުވާލުމުގެ ނިޒާމު އަނބުރާ ގެންނަން މަސައްކަތްކުރާ ކަމަށް ވަނީ ތުހުމަތު ކުރައްވާފައެވެ.

އެގޮތުން ރިޔާސީ އިންތިހާބު އެއްބުރުން ނިމޭ ގޮތް ހަދަން ރައްޔިތުންގެ ފެންނަ ނުފެންނަ ވޯޓަކަށް އަހާނެކަން ރައީސް ޑރ. މުއިއްޒު އިއުލާން ކުރެއްވުމަކީ ނުބައި ސިގްނަލެއްކަން ވަނީ ފާހަގަކުރައްވާފައެވެ. އަދި އޭގެ ބޭނުމަކީ ވެރިކަމުގައި އޮވެ، ވޯޓު ފޮށިތައް އަނެއްކާ ވެސް އޮޅުވާލާނެ ނިޒާމަށް އަނބުރާ ދިޔުން ކަމަށް ތުހުމަތު ކުރެއްވިއެވެ.

ފައްޔާޟު ވަނީ އެކަންކަމަށް ފުރުސަތުދީގެން ތިބެން ހެޔޮނުވާނެ ކަމަށާއި އެކަންކަމާ ދެކޮޅަށް ކުރެވެންހުރި ހުރިހާ މަސައްކަތެއް ކުރަންޖެހޭ ކަމަށް ވެސް ވިދާޅުވެފައެވެ.