އިސްރާއީލް ޕާސްޕޯޓުގައި ރާއްޖެއަށް އެތެރެވުން މަނާކުރުން އަންނައަހަރަށް ފަސްކޮށްފިއެވެ.

މިކަމުގައި އިމިގްރޭޝަން ގާނޫނަށް އިސްލާހު ގެނައުމަށް ހުށަހަޅާފައިވާ ބިލުގެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށް ފާސްކޮށްފައިވަނީ ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ ނުވަތަ 241 ކޮމިޓީންނެވެ.

އެގައުމުގެ ޕާސްޕޯޓު އޮންނަ މީހުން ރާއްޖެ އަށް އެތެރެވުން މަނާކުރުމަށް އިމިގްރޭޝަން ގާނޫނު ބަދަލުކުރަން މިއަހަރުގެ މޭ މަހުގެ 29 ވަނަ ދުވަހު ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ.

މި ބިލު މަޖިލިހަށް ބަލައިގަނެ ކޮމިޓީ އަށް ފޮނުވި ފަހުން، އެ ބިލް އަދިވެސް އޮތީ ކޮމިޓީ މަރުހަލާގައެވެ.

އިސްރޭލު ޕާސްޕޯޓު މަނާކުރާ ބިލުގެ މަސައްކަތް އެޖެންޑާކޮށް މިއަދު ބޭއްވި 241 ކޮމިޓީ ބައްދަލުވުމުގައި ބިލުގެ މަސައްކަތް ފެބްރުއަރީގެ ނިޔަލަށް ދަންމާލަން ހުށަހެޅުއްވީ ތުޅާދޫ ދާއިރާގެ ތުޅާދޫ ދާއިރާގެ މެންބަރު އަބްދުލްހަންނާން އެވެ.

މެމްބަރު ވިދާޅުވީ އެ އިސްލާހު ގެނައުމަކީ ވަރަށް ހައްސާސީ ކަމެއް ކަމަށާއި އެހެންކަމުން މި ކަމުގައި މަޝްވަރާ ކުރަންޖެހޭ ގިނަ ބަޔަކު ތިބި ކަމަށް ގަބޫލު ކުރައްވާ ކަމަށެވެ. އަދި ކުރިއަށް އޮތީ އަންނަ އަހަރަށް ލަފާކުރާ ދައުލަތުގެ ބަޖެޓުގެ މަސައްކަތަށް ވެފައި، ޑިސެންބަރު މަހު މަޖިލިސް ޗުއްޓީ އަށް ދާނެތީ މި ބިލް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށް ހަންނާން ހުށަަހެޅުއްވިއެވެ.

އޭނާގެ ހުށަހެޅުއްވުމަށް ތާއީދުކުރެއްވީ މާފަންނު އުތުުރު ދާއިރާގެ އެމްއެންޕީ މެމްބަރު މުހައްމަދު ނާޒިމެވެ. އެ ހުށަހެޅުން ކޮމިޓީން ވަނީ ފާސްކޮށްފައެވެ.