އިސްރާއީލުގެ މިނިސްޓަރެއް އަގްސާ މިސްކިތަށް ވަނުން ދިވެހި ސަރުކާރުން ކުށްވެރިކޮށްފިއެވެ.

ރާއްޖޭގެ ފޮރިން މިނިސްޓްރީން ނެރުއްވި ބަޔާނެއްގައި ވިދާޅުވީ އިސްރާއީލުގެ ގައުމީ ސަލާމަތާބެހޭ ވަޒީރު، މަސްޖިދުލްއަޤްޞާ އަށް ވަދެގަތުމާއި ގުޅިގެން ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ.

މިއީ އިސްލާމީ މުގައްދަސް ބިނާތަކުގެ ހުރުމަތް ކަނޑާލުމުގެ ޢަމަލެއް ކަމަށާއި އެފަދަ ތަންތަނުގެ ދީނީ އަދި ތާރީހީ ހައިސިއްޔަތު ބަދަލުކުރުމަށް ތަކުރާރުކޮށް އިސްރާއީލުން ކުރަމުންދާ ޢަމަލެއްކަން އެ ބަޔާނުގައި ފާހަގަކޮށްފައި ވެއެވެ.

މީގެއިތުރުން މިއީ ބައިނަލްއަގްވާމީ ގާނޫނުތަކާ ވެސް ހިލާފު ޢަމަލެއްކަމުގައި ދިވެހި ސަރުކާރުން ގަބޫލުކުރައްވާ ކަމަށާއި މިއީ ފަލަސްތީނުގެ ލޮބުވެތި ރައްޔިތުންނާއިއެކު ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ހައްގުތަކަށް އަރައިގަތުމުގެ ޢަމަލެއް ކަމުގައިވެސް ދިވެހި ސަރުކާރުން ފާހަގަކުރައްވައެވެ.

ދިވެހި ސަރުކާރުން ވަނީ މިފަދަ އަނިޔާވެރި ޢަމަލުތައް ހިންގުން ހުއްޓުވުމަށާއި ބައިނަލްއަގްވާމީ ގާނޫނުތަކާއި އިންސާނީ ހައްގުތަކަށް އިހްތިރާމުކުރުން ކަށަވަރުކުރުމަށް ހަރުދަނާ، އަވަސް ފިޔަވަޅުތަކެއް އެޅުމަށް ބައިނަލްއަގްވާމީ މުޖުތަމައަށް ގޮވާލައްވާފައެވެ.

މި ހަމަނުޖެހުމަށް ދެމެހެއްޓެނިވި ސުލްހަވެރި ހައްލެއް ގެނެވޭނީ 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަންކުރާ ރަށްކަމުގައި ކަނޑައަޅައި، އެއީ މިނިވަން، މުސްތަގިއްލު އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްތީނުގެ ދައުލަތް ގާއިމުކުރެވުމުން ކަމުގައި ދިވެހި ސަރުކާރުން ދެކޭ ކަަމަށް ވެސް ފޮރިން މިނިސްޓްރީން ވިދާޅުވެއެވެ.