ރާއްޖޭގައި މުދަލު ޒަކާތް ނުދައްކާ ނުވަތަ މުދަކު ޒަކާތް ދައްކާ މީހުންގެ އަދަދު މަދުވާ ސަބަބު ދެނެގަތުމަށް ދިރާސާއެއް ހެދުމަށް ނިންމައިފިއެވެ.

ޕީއެސްއެމް ނިއުސްގެ 'ރާއްޖެ މިއަދު' ޕްރޮގްރާމުގައި ވާހަކަދައްކަވަމުން މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލް ފަޟީލަތުއްޝައިޚް ޢިއްޒައްދީން ޢަދްނާން ވިދާޅުވީ މި ދިރާސާ ކުރުމަށް ނިންމާފައިވަނީ އަންނަ 2025 ވަނަ އަހަރު ކަމަށެވެ.

ޢިއްޒައްދީން ވިދާޅުވީ މިފަދަ ދިރާސާއެއް ރަސްމީ ސިަފއެއްގައި މިހައިތަނަށް ހިންގާފައި ނުވިނަމަވެސް ޒަކާތު ހައުސްއިން ހިންގި އެކި ހަރަކާތްތަކުގެ ތެރެއިން ބައެއް ސަބަބުތައް ދެނެގަނެވިފައިވާ ކަމަށެވެ. އެގޮތުން، މުދަލު ޒަކާތަކީ އިސްލާމް ދީނުގައި ކިހާ މުހިންމުކަމެއްކަމާމެދު އާންމުން ހޭލުންތެރިވެފައި ނެތުމަކީ މައިގަނޑު ސަބަބެއްކަން ވަނީ ފާހަގަކުރައްވާފައެވެ.

މީގެއިތުރުން މުދަލު ޒަކާތް ދެއްކުމުން އަތުގައި ހުންނަ މުދާ މަދުވާނެކަމަަށް ބައެއް މީހުން ދެކޭ ކަމަށާއި އެހެންނަމަވެސް މުދަލުގެ ޒަކާތް ދައްކާ ފަރާތްތަކުގެ މުދަލުގައި ބަރަކާތްލައްވައި، މުދާ އިތުރުވަމުންދާކަން މުސްލިމް ގައުމުތަކުގައި ހަދާފައިވާ ދިރާސާތަކުންވެސް ސާބިތުވެފައިވާ ކަމަށް ޝައިހް ވިދާޅުވިއެވެ.

ކުރިއަށް އޮތްތަނުގައި ޒަކާތު ހައުސްގެ ފަރާތުން ޒަކާތުގެ އެކި ކަންކަމަށް އާންމުން ހޭލުންތެރިކުރުމުގެ ގިނަ ޕްރޮގްރާމުތައް ކުރިއަށްގެންދާނެކަން ޝައިހް ވަނީ ހާމަކުރައްވާފައެވެ.