ވާސޯ މެޑިކަލް ސެންޓަރ (ވިއެމްސީ) އާއި ވީލްޗެއަރ އެސޯސިއޭޝަން އޮފް މޯލްޑިވްސް (ޑަބްލިއުއޭއެމް) ގުޅިގެން ނުކުޅެދުންތެރިކަން ހުންނަ ކުދިންނަށް ހާއްސަ ޕްރޮގްރާމެއް ފަށައިފިއެވެ.

ވީއެމްސީ އާއި ޑަބްލިއުއޭއެމް އިން 'އޮއިވަރު' އަށް މައުލޫމާތު ދިން ގޮތުގައި މިއީ 'ހުރި ހާލަތުން ރަނގަޅު ހާލަަތަށް ބަދަލުކޮށްދިނުން' ނަމުގައި ކުރިއަށް ގެންދާ ޕްރޮގްރާމެކެވެ. އަދި މި ޕްރޮގްރާމު މިއަދު ވަނީ ފަށާފައެވެ.

ވިލިމާލޭގައި ހަދާފައިވާ ޑިސެބިލިޓީސް އެކްސެސިބްލް ބީޗް ސްލިޕްވޭ ގައި މި ޕްރޮގްރާމު ކޮންމެ ހަފުތާއެއްގެ ވެސް ހުކުރު އަދި ހޮނިހިރު ދުވަހު ބޭއްވުމަށް ނިންމާފައިވާ ކަަމަށް ވެސް މައުލޫމާތު ދީފައި ވެއެވެ. އަދި މި ޕްރޮގްރާމު ކުރިއަށްދާނީ އެ ދެ ދުވަހުގެ ހެނދުނު 7 ޖަހާއިރު ކަމަށް ވެސް ވަނީ ހާމަކޮށްފައެވެ.

މިއީ ވީއެމްސީ އަދި ޑަބްލިއުއޭއެމްގެ މެމްބަރ ބާއިސްގެ ހެޔޮއެދުމާއެކު މުޅިން ހިލޭ ކުރިއަށްގެންދާ ޕްރޮގްރާމެކެވެ. ތިން މަސްދުވަހުގެ މުއްދަތަށް ކުރިއަށްގެންދާ މި ޕްރޮގްރާމުގައި ބައިވެރިވާން ބޭނުން ފަރާތްތަކުން 9656060 ނުވަތަ 9536610 އަށް ގުޅުމަށް އެ ފަރާތުން އެދެއެވެ.

ވީ.އެމް.ސީ އާއި ޑަބްލިއު.އޭ.އެމް އިން ގެންދަނީ އެންމެ ބޭނުންޖެހިފައިވާ މިފަދަ ފަރާތްތަކަށް ބޭނުންވާ އެހީތެރިކަން ހޯދައިދިނުމަށް ވަރަށްބޮޑަށް މަސައްކަތް ކުރަމުންނެވެ. އަދި މިފަދަ އެހީ ދިނުމަށް ބޭނުންވާ ފަރާތްތަކުން ދޭ އެހީތައް އަމާނާތްތެރިކަމާއެކު ދަނީ ފޯރުކޮށްދެމުންނެވެ.

މީގެއިތުރުން ވެސް ހާއްސައެހީއަށް ބޭނުންވާ ފަރާތްތަކަށް ބޭނުންވާ ވަރަށްގިނަ ކަންކަމަށް މަގުފަހިކޮށްދީ، އެ އިންތިޒާމުތައް ވެސް ދަނީ ހަމަޖައްސައިދެމުންނެވެ.