އިންސާނާގެ އަގީދާ ނަފްސު މާޔޫސްކަމުން ސަލާމަތް ވުމަށްޓަކައި އަގީދާގައި ސާބިތުވުމަކީ މުހިންމުކަމެއް ކަމުގައި ހުކުރު ހުތުބާގައި ހަނދާންކޮށްދީފިއެވެ.

އެގޮތުން ވަސްވާސްތަކުގެ ޝިކާރައަކަށް ނުވެ، ވަރުގަދަ އަޒުމަކާއެކު ސަލާމަތުގެ އައްސޭރިއަށް ވާސިލް ވެވިދާނެކަމަށް ހުތުބާގައި ވަނީ ބުނެފައެވެ.

ދިރިއުޅުމުގެ ހަޔާތަކީ ހިތްދަތިކަންކަމާއި ހިތާމަތަކާއި ދަތި އުނދަގޫ ކަންކަން ހިމެނިގެންވާ ހަޔާތެއްކަން ހަނދާންކޮށްދީ ހުތުބާގައި އިތުރަށް ބުނީ ދަތި އުނދަގުލަށް ފަހު ފަސޭހަކަން އަންނާނެކަން ކަށަވަރު ކަމަށެެވެ. އަދި ހިތާމަތަކަށް ފަހު، އުފާވެރިކަން އަންނާނެކަން ޔަގީންއިރު، އެއީ މި ހަޔާތުގެ ފިތުރަތުކަން ވެސް ވަނީ ހަނދުމަކޮށްދީފައެވެ.

މީގެއިތުރުން ހިތްދަތިކަމުން އަރައިގަތުމަށް މަސައްކަތް ކުރަންވާނީ އަޒުމާއި ހިތްވަރާ އެކުގައި ކަމަށާއި ކިތަންމެ އަގީދާ ވަރުގަދަ މީހަކުނަމަވެސް މާޔޫސްވުމުގެ ތެރެއަށް ވެއްޓިދާނެ ހާލަތެއް އަތުވެދާނެކަން ހުތުބާގައި ވަނީ ފާހަގަކޮށްފައެވެ. އަދި އެއީ އިންސާނާގެ ބަލިކަށިކަން ކަމުގައި ވެސް ފާހަގަކޮށްފައި ވެއެވެ.

ޚުތުބާގައި ބުނީ ހިތްތަކަށް ހަމަޖެހުން ލިބޭ ސަބަބުތަކުގެ ތެރޭގައި ހެޔޮލަފާ މީހުންނާ އެކު އުޅުމާއި އެމީހުންގެ ވާހަކަތައް އަޑުއަހައި، އެމީހުންގެ ނަސޭހަތްތަކުގެ ފައިދާހޯދުން ހިމެނޭ ކަމަށެވެ. އަދި މިފަދަ މީހުންނާއެކު މަޖިލިސްކުރުމަކީ ރަހްމާނުވަންތަ ﷲ ރުހިވޮޑިގަންނަވާ ކަމެއް ކަމަށް ވެސް ހަނދާންކޮށްދިނެވެ.

ހަމައެއާއެކު ހިތްތަކަށް ހިތްހަމަޖެހުން ލިބޭ ސަބަބުތަކުގެ ތެރޭގައި ކީރިތި ގުރްއާނާ މެދު ވިސްނައި ފިކުރުކޮށް އެ ފޮތް ކިޔެވުން ހިމެނޭކަން ހަނދާންކޮށްދީ ހުތުބާގައި ބުނީ މިއީ ހިތާމަތައް ފިލުވައި، ކަންބޮޑުވުންތަކާއި ހިތްދަތިކަން ދުރުކުރުމުގައި އެންމެ މަތިވެރި ސަބަބުތަކުގެ ތެރޭގައި ހިމެނޭ ކަމެއް ކަމަށެވެ.

ކީރިތި ގުރްއާން ކިޔެވުމުން އަޅާގެ ހިތަށް ހަމަޖެހުން ލިބޭކަން ވެސް "ދިރިއުޅުމުގައި ދިމާވާ ދަތިތަކާމެދު މާޔޫސް ނުވުން" މި މައުޟޫއަށް ތައްޔާރުކޮށްފައިވާ ހުތުބާގައި ވަނީ ބުނެފައެވެ.