ހަޔަރ އެޑިއުުކޭޝަން މިނިސްޓަރ ޑރ. މަރްޔަމް މާރިޔާ، އެހެން މިނިސްޓްރީއަކަށް ބަދަލުކުރުމުން ދޭހަވަނީ މި ސަރުކާރުން ތަފާތުކުރުން ގެންގުޅޭކަން ކަމުގައި ނިޝާން އިއްޒުއްދީން އިއްޒަތުގެ ވެރިޔާ އަނީސާ އަހުމަދު ވިދާޅުވެއްޖެއެވެ.

ފޭސްބުކްގައި ކުރައްވާފައިވާ ޕޯސްޓެއްގައި އެކަމަނާ ވިދާޅުވީ ތައުލީމީ ދާއިރާއިން މަތީތައުލީމާއި ގިނަތަޖުރިބާ ހާސިލުކޮށްފައިވާ މީހަކު މަތީތައުލީމާބެހޭ ވުޒާރާ ހިންގަމުން ގެންދަނިކޮށް ކުއްލިއަކަށް ދަނޑުވެރިކަމާއި ދިރޭތަކެއްޗާބެހޭ ވުޒާރާއަށް ބަދަލުކޮށް، އޭނާހިންގަމުން ގެންދިޔަ ވުޒާރާއަށް އެހެންވަޒީރަކު އައްޔަނު ކުރުމުން ކުޑަހައިރާންކަމެއް ލިބުނުކަމަށެވެ.

"އެކަމަކު ވިސްނާލުމުން ސަބަބު ހިތަށް ގެނެވިއްޖެއެވެ. ގެދޮރުވެރިކަމާއި ބިމާބެހޭވުޒާރާއާއި އިމާރާތްކުރުމާއި ބިނާރާބެހޭ ވުޒާރާ އެއްކޮށްލުމުން ޕޯޓުފޯލިއޯ ނެތިގެންދިޔައީ ފިރިހެންވަޒީރެއްގެ ކަމަށްވެފައި، ހުސްކޮށް ހުރީ ދިރޭތަކެއްޗާބެހޭ ވުޒާރާކަމުން އެޕޯޓުފޯލިއޯ ފިރިހެނަކާހަވާލުކޮށްފިނަމަ، ފިރިހެނެއްގެ ދަރަޖައާއި ކަރާމާތަށްއުނިކަމެއް އަތުވެދާނެތީ އަންހެނަކާހަވާލުކުރީއެވެ."

މީގެއިތުރުން އަޑަށްބާރުލާފައި އަންހެނުން ބާރުވެރިކުރާވާހަކަ ތާއަބަދު އެންމެންވެގެން ދެއްކިނަމަވެސް ނަތީޖާނެރެވޭނީ ޢަމަލީގޮތުން ކަންތައްތަކެއްކޮއްގެންކަން ކޮންމެމީހަކަށް ވެސް އެގޭނެ ކަމަށް އެކަމަނާ ވަނީ ވިދާޅުވެފައެވެ.

އެހެންވީމާ، މިއީ ނޭދެވޭ ތަފާތުކުރުމެއްނޫނޭ ކޮންމެމީހަކުބުންޏަސް އެކަމަނާ އަށް އެކަމާއެއްބަހެއް ނުވެވޭނެ ކަމަށް ވެސް އެ ޕޯސްޓުގައި ވަނީ ވިދާޅުވެފައެވެ.

ރައީސް ޑރ. މުހައްމަދު މުއިއްޒު ވަޒީރުންގެ މަޖިލީހަށް ޑިސެމްބަރ 26 ވަނަ ދުވަހު ގެންނެވި ބަދަލުތަލުގެ ތެރޭގައި ހައުސިންގ މިނިސްޓްރީއާއި ކޮންސްޓްރަކްޝަން މިނިސްޓްރީ އެއްކޮށްލައި، އެ މިނިސްޓްރީގެ ހިންގުން ކޮންސްޓްރަކްޝަން މިނިސްޓަރަކަށް ހުންނެވި ޑރ. އަބްދުﷲ މުއްތަލިބާ ވަނީ ހަވާލުކުރައްވާފައެވެ. އަދި ފިނޭންސް މިނިސްޓްރީގެ މެންޑޭޓަށް ހައުސިންގ މިނިސްޓްރީގެ ދަށުން ކުރިންހިންގި ޕްލޭނިންގގެ މަސައްކަތް ބަދަލުކުރައްވައި، އެ މިނިސްޓްރީގެ ނަމަކީ މިނިސްޓްރީ އޮފް ފިނޭންސް އެންޑް ޕްލޭނިންގ ކަމުގައިވަނީ ހަމަޖައްސަވާފައެވެ.

މީގެއިތުރުން ހައުސިންގ މިނިސްޓަރުކަމުގައި ހުންނެވި ޑރ. އަލީ ހައިދަރު، ހަޔަރ އެޑިއުކޭޝަން މިނިސްޓަރުކަމަށް ބަދަލުކުރެއްވުމާއި ހަޔަރ އެޑިއުކޭޝަން މިނިސްޓަރުކަމުގައި ހުންނެވި ޑރ. މަރިޔަމް މާރިޔާ، އެގްރިކަލްޗަރ މިނިސްޓަރުކަމަށް ބަދަލުކުރެއްވުން ހިމެނެއެވެ.