މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) ގެ މިއަހަރުގެ ޓްރެވަލް ކޮންފަރެންސް އައްޑު ސިޓީގައި ބޭއްވުމަށް ނިންމައިފިއެވެ.

މަޓާޓޯ އިން ހާމަކޮށްފައިވާ ގޮތުގައި މި ކޮންފަރެންސް ބާއްވާނީ މި ޖަނަވަރީ މަހުގެ 25 ވަނަ ދުވަހު އެ ސިޓީގެ އިކުއޭޓަރ ވިލެޖުގައެވެ.

މިއީ ޓޫރިޒަމް މިނިސްޓްރީ އާއި ސޯޝަލް މިނިސްޓްރީ، އެމްއެމްޕީއާރްސީ / ވިޒިޓް މޯލްޑިވްސް، އައްޑޫ ސިޓީ ކައުންސިލް، ވިމެން އިން މެނޭޖްމެންޓް މޯލްޑިވްސް، ވިމެން އޮން ބޯޑު، ވިމެން އޮންޓްރެޕްރެނަރސް އެސޯސިއޭޝަން މޯލްޑިވްސް އަދި އެސޯސިއޭޝަން އޮފް ލޭޑީ އޮންޓްރެޕްރެނަރސް ފަދަ އަންހެނުންގެ ޖަމިއްޔާތަކުގެ ތާއީދާއެކު ބާއްވާ ކޮންފަރެންސެކެވެ.

މި ކޮންފަރެންސްގައި ވާހަކަ ދައްކާނީ އައްޑޫގައި އަންހެނުންނަށް ހުރި ފުރުސަތުތައް - ފަތުރުވެރިކަމުގެ ދާއިރާގެ ވަޒީފާތައް ހަމައެކަނި ރިސޯޓުތަކަށް ހަނިވެފައި ނުވުން އަދި މަސައްކަތްކުރާ އަންހެނުންނާމެދު މުޖުތަމައުގައި އޮންނަ ނޭދެވޭ ނަޒަރު ބަދަލުކުރުން މި ދެ މައުޟޫއަށެވެ. އަދި ޕެނަލް ޑިސްކަޝަންގައި މުޅިން ވެސް ހަރަކާތްތެރިވާނީ އަންހެން ބޭފުޅުންނެވެ.

ބީސީސީއާ ގުޅިގެން ކުރިއަށްގެންދާ މި ކޮންފަރެންސްގައި އަންހެނުންނަށް އަމާޒުކޮށްގެން ފައިނޭންޝަލް ލިޓަރަސީ ޓްރެއިނިންގ ސެޝަނެއް ވެސް ހިމެނޭއިރު، މިއީ ހިލޭ ކުރިއަށްގެންދާ ތަމްރީނު ޕްރޮގްރާމެކެވެ. މި ޕްރޮގްރާމުގައި ރަޖިސްޓަރީވުމުގެ ފުރުސަތު ޖަނަވަރީ މަހުގެ 20 ވަނަ ދުވަހާ ހަމައަށް ވަނީ ހުޅުވާލާފައެވެ. 

މިއީ 2024 ވަނަ އަހަރުގެ އޯގަސްޓް މަހު ފެށި، ފަތުރުވެރިކަމުގެ ދާއިރާގައި އަންހެނުން ބާރުވެރިކުރުވުމަށް އަމާޒުކޮށްގެން މަޓާޓޯ އިން ކުރިއަށްގެންދާ މޯލްޑިވްސް ޓްރެވެލް ކޮންފެރެންސް ވިމެންސް އެޑިޝަން އިނީޝިއޭޓިވްގެ ދަށުން ބޭއްވޭ ކޮންފަރެންސެކެވެ.

ފުރަތަމަ ބޭއްވި ކޮންފަރެންސް ފަދައިން، މި ކޮންފަރެންސް ނިމުމުން ތަފްސީލީ ރިޕޯޓެއް ޝާއިއުކުރުމަށް ވަނީ ނިންމާފައެވެ. އަދި މިއަހަރުގެ މެއި މަހު ތޮއްޑޫގައި އިތުރު ކޮންފަރެންސެއް ބާއްވާއިރު، ހޮޓެލް ޖެން އާއި ގުޅިގެން މާލޭގައި އޯގަސްޓް މަހު ވެސް ކޮންފަރެންސެއް ބޭއްވުމަށް ވަނީ ރޭވިފައެވެ.