ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށް ޓަކައި ވެވޭ އެއްބަސްވުމަކަށް ނުހެދުމަށާއި ސޮއިކުރާ ޢަޤުދަކީ އޮފީސް ވަތްގަނޑުގައި ބާއްވަން ކުރަހައިލެވޭ ތަސްވީރަކަށް ނުހެދުމަށް ހުކުރު ހުތުބާގައި ނަސޭހަތްތެރިވެއްޖެއެވެ.

ޖަނަވަރީ 10 ވީ ހުކުރު ދުވަހުގެ ހުތުބާގައި ވަނީ ވަޒީފާ ބަޔާނަކީ ހިދުމަތް ފޯރުކޮށް ދިނުމަށް ހިފޭ އަހުދު ކަށަވަރެއް ކަމަށާއި އެހެންކަމުން އެ އަގުދުގައި ލިޔެވިފައިވާ ކޮންމެ ލަފުޒަކަށް، ޖުމްލައަކަށް ފަރުވާތެރިވެ ރައްކާތެރިވުމަށް އެދިފައެވެ.

"ވަޒީފާގެ ތެރެއިން ހިދުމަތަށް އެދޭ ފަރާތްތަކަށް ފަރުވާތެރި ކަމާއެކު އެހިދުމަތެއް ވީއެންމެ ފުރިހަމައަށް އިހްތިރާމާއި އޯގާތެރި ކަމާއެކު ފޯރުކޮށްދޭށެވެ! މުވައްޒަފުންގެ ފަހަތުން ހިދުމަތް ލިބިގަންނަ މީހާ ދުވަން ނުޖެހޭގޮތަށް، ތިބާގެ ދުވަހުގެ މަސައްކަތް ތަރުތީބު ކުރާށެވެ."

ހުތުބާގައި ބުނީ އޮފީހުގެ ކަރަންޓާއި ފެނަކީ ވެސް އަމާނާތެއް ކަމަށާއި ފޯނާއި ކަރުދާހާ ދެއްޔަކީ ވެސް އަމާނާތެއް ކަމަށެވެ. އަދި އޮފީހުގެ މެޝިނަރީތަކާއި ވަޒީފާއަށް ކަނޑައެޅިފައިވާ ވަގުތަކީ ވެސް އަމާނާތެއް ކަމަށެވެ.

މީގެއިތުރުން މުއައްސަސާގެ މުހިއްމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީ ވެސް އަމާނާތެއްކަން ހަނދާންކޮށްދީފައިވާއިރު، މި އަމާނާތްތަކަށް ރައްކާތެރިވުމަށް ވެސް ނަސޭހަތްތެރިވެފައި ވެއެވެ. އަދި ވަޒީފާގެ މުހިއްމު ވަގުތުތައް އޮފީހުން ބޭރުގައި އަމިއްލަ ކަންކަމަށް ހޭދަކުރާއިރު، ހަވާލުވި އަމާނާތުގެ މަތިން ހަނދުމަކުރުމަސް ވެސް ވަނީ ނަސޭހަތްތެރިވެފައެވެ.

ހުތުބާގައި އިތުރަށް ވަނީ އޮފީހުގެ ތަކެތި ނަހަމަ ގޮތުގައި ބޭނުން ކުރާއިރު، މާތްﷲ ބައްލަވައިވޮޑިގެންވާކަން ހަނދުމަކުރުމަށާއި އޮފީހުގެ ސިއްރުތައް މީސްމީޑިއާގެ މަންސަތަކުގައި ފަތުރާއިރު، ފަހުން ހިތާމަކުރަންޖެހޭނެކަން ވެސް ހަނދާންކޮށްދީފައެވެ.