ކުރީގެ ރައީސް މުޙައްމަދު ނަޝީދު އިސްވެހުންނަވައި އުފައްދަވާފައިވާ ސިޔާސީ ޕާޓީ، ދަ ޑިމޮކްރެޓްސްގެ މައި ތަނބުތަކުގެ ގޮތުގައި ހިމެނޭ ބައެއް ބޭފުޅުން އެ ޕާޓީން ވަކިވާން ފަށައިފިއެވެ.

އެގޮތުން އެޕާޓީގެ ރައީސްގެ މަގާމުގައި ހުންނެވި ހަސަން ލަތީފްއާއި ޙުސައިން އަމްރުއާއި މުޙައްމަދު ޝިފާޒު އަދި ޢަލީ އާޒިމް ވަނީ އެ ޕާޓީން ވަކިވެވަޑައިގެންފައެވެ.

މީގެތެރެއިން އަމްރުއާއި ޝިފާޒު އަދި އާޒިމް ވަނީ އެ ބޭފުޅުންގެ ކުރީގެ ޕާޓީ އެމްޑީޕީ އާ ގުޅިވަޑައިގެންފައެވެ. އެހެންނަމަވެސް ހަސަން ލަތީފް އެއްވެސް ޕާޓީއަކާ ގުޅިވަޑައިގެންނެވިކަން ހާމަކުރައްވާފައެއް ނުވެއެވެ.

ހަސަން ލަތީފް ވިދާޅުވެފައިވަނީ ޑިމޮކްރެޓްސް އިން އިސްތިއުފާ ދެއްވީ މި ވަގުތަށް މުހިންމު ކަމެއްގެ ގޮތުގައި ދެކެވަޑައިގަންނަވާތީ ކަމަށެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ވެރިކަމުގައި އެސްޓީއޯގެ މެނޭޖިންގ ޑިރެކްޓަރގެ މަގާމު އަދާކުރައްވާފައިވާ ޙުސައިން އަމްރު ވަނީ ނިމިދިޔަ ރިޔާސީ އިންތިހާބުގައި ޑިމޮކްރެޓްސްގެ ކެނޑިޑޭޓް އިލްޔާސް ލަބީބުގެ ރަނިންމޭޓުގެ ގޮތުގައި ވާދަކުރައްވާފައެވެ. އަދި ޝިފާޒު ވަނީ ރައީސް އޮފީހުގެ މިނިސްޓަރެއްގެ ގޮތުގައި ހުންނަވައި، އެމްޑީޕީ ދޫކުރެއްވިއިރު، ޢަލީ އާޒިމް ވަނީ 19 ވަނަ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރުކަން ކުރައްވާފައެވެ.

މި ބޭބޭފުޅުންނަކީ އެންމެފަހުން ރާއްޖޭގައި ބޭއްވި ރިޔާސީ އިންތިހާބުގައި އެމްޑީޕީގެ އެތެރޭގައި އުފެދުނު ހިޔާލުތަފާތުވުންތަކާއެކު އެ ޕާޓީން ވަކިވި ފަރާތްތަކެވެ.