ރައީސް ޑރ. މުޙައްމަދު މުޢިއްޒު ރަސްމީ ދަތުރުފުޅެއްގައި ރާއްޖެއިން ބޭރަށް ފުރާވަޑައިގަތުމަށް ހަމަޖެހިއްޖެއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ މިއީ އެސްޓޯނިއާގެ ރައީސް ޑރ. އަލާރ ކާރިސްގެ ދައުވަތަކަށް ކުރައްވާ ދަތުރުފުޅެއް ކަމަށެވެ. މި ދަތުރުފުޅު ކުރައްވާނީ މި ޖަނަވަރީ މަހުގެ 13 ން 16 ގެ ނިޔަލަށް ކަމަށެވެ.

މިއީ ރާއްޖޭގެ ރައީސަކު އެސްޓޯނިއާއަށް ރަސްމީ ދަތުރުފުޅެއް ކުރައްވާ ފުރަތަމަ ފަހަރެވެ.

މި ދަތުރުފުޅުގައި ދެ ގައުމުގެ ދޭދޭ ގުޅުން އިތުރަށް ހަރުދަނާ ކުރެއްވުމާއި ދެ ގައުމު ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުން މަޝްވަރާ ކުރައްވައި، ޑިޖިޓަލް ދާއިރާ އާއި ސައިބަރ އަދި އީ-ގަވަނެންސް ދާއިރާ އާއި މޫސުމީ ބަދަލުތަކާއި ތިމާވެއްޓާ ގުޅުންހުރި ދާއިރާތަކުން ގުޅުން ބަދަހިކުރުމަށް މަޝްވަރާ ކުރައްވާނެކަމަށް ރައީސް އޮފީހުން ވިދާޅުވިއެވެ.

މީގެއިތުރުން ސައިންސާއި ތައުލީމީ ދާއިރާއިން ވެސް އިތުރަށް ގުޅުން ބަދަހިކުރުމާ ގުޅޭގޮތުން ދެ ރައީސުން މަޝްވަރާ ކުރައްވާނެ ކަމަށް ވަނީ ވިދާޅުވެފައެވެ. އަދި އެގައުމުގެ ގާނޫނުހަދާ މަޖިލީހުގެ ރައީސް ލައުރީ ހުޒަރ އާއި ދައުލަތުގެ ވަޒީރުންނާ ވެސް ބައްދަލުކުރައްވާނެ ކަމަށް ވިދާޅުވެފައި ވެއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ އެސްޓޯނިއާގެ އެޑިއުކޭޝަން އެންޑް ރިސަރޗް މިނިސްޓަރާއި ކްލައިމެޓް މިނިސްޓަރާއި ހެލްތު މިނިސްޓަރާއި ޖަސްޓިސް އެންޑް ޑިޖިޓަލް އެފެއަރޒް މިނިސްޓަރު އަދި ފޮރިން މިނިސްޓްރީގެ ސެކްރެޓަރީ ޖެނެރަލް އާ ރައީސް ބައްދަލުކުރައްވާނެ ކަމަށެވެ. އަދި ޓާޓޫއަށް ވަޑައިގެން އެ ސިޓީގެ މޭޔަރާ ވެސް ބައްދަލުކުރެއްވުމަށް ވަނީ ހަމަޖެހިފައެވެ.

ޓާޓޫއަކީ އެސްޓޯނިއާގެ ދެވަނައަށް އެންމެ ބޮޑު ސިޓީއެވެ. އެ ސިޓީގައި ހުންނަ ކްލިނިކަލް މެޑިސިންގެ ދާއިރާގައި އެންމެ މަގުބޫލު އެއް ޔުނިވަރސިޓީކަމަށްވާ ޔުނިވަރސިޓީ އޮފް ޓާޓޫއަށް ރައީސް ޒިޔާރަތް ކުރައްވައި، އެ ޔުނިވަރސިޓީގެ ޖީނޯމް ޑާޓާ ބޭސް ސެންޓަރާއި ގްރީނަރޖީ ޑާޓާ ސެންޓަރު ރައީސް ބައްލަައިލެއްވުމަށް ވަނީ ތާވަލުކޮށްފައެވެ.

މި ރަސްމީ ދަތުރުފުޅުގައި ފޮރިން މިނިސްޓަރ ޑރ. އަބްދުﷲ ޚަލީލުއާއި ހޯމް މިނިސްޓަރ ޢަލީ އިޙްސާން ބައިވެރިވެވަޑައިގަންނަވާނެއެވެ. އަދި ރާއްޖޭގެ ޓެކްނޮލޮޖީ ދާއިރާގައި ފާހަގަކުރެވޭ ބޭފުޅުން ހިމެނިވަޑައިގަންނަވާ ވަފުދެއް ވެސް ބައިވެެރިވެވަޑައިގަންނަވާނެއެވެ.