މާލެއަށް ބޯކޮށް ވާރޭވެހި ފެން ބޮޑުވުމުގެ ސަބަބުން މާލޭގެ 6 ސަރަހައްދެއްގައި ޕަމްޕު ބަހައްޓައިގެން 19000 އަށްވުރެ ގިނަ ޓަނުގެ ފެން މާލެއިން ބޭރުކޮށްފިއެވެ.

އެމްއެންޑީއެފް އިން ވިދާޅުވީ މާލޭގެ މަގުތަކުގައި ފެން ބޮޑުވެގެން، ފެން ހިންދުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސް އިން ޕަމްޕު ބަހައްޓާފައިވަނީ ވެސްޓްޕާކުގައި 7 ޕަމްޕް، އައިޖީއެމްއެޗް ސަރަހައްދުގައި 3 ޕަމްޕް، މާފަންނު ފެރީ ޓަރމިނަލް ސަރަހައްދުގައި 3 ޕަމްޕް ކަމަށެވެ.

މީގެއިތުރުން ކުޑަކުދިންގެ ބަގީޗާ އާއި ސޯޝަލް ސެންޓަރު ސަރަހައްދުގައި ވެސް ޕަމްޕު ބަހައްޓައިގެން ފެން ހިންދުމުގެ މަސައްކަތް ކުރަމުން އަންނަކަމަށް ވިދާޅުވިއެވެ.

އެމްއެންޑީއެފް އިން ވިދާޅުވީ މިއަދު ހެނދުނު 10 ޖެހުމާއި ހަމައަށް 19812 ޓަނުގެ ފެން ހިއްކިފައިވާ ކަމަށެވެ. އަދި މިހައިހާތަނަށް 104 ގެއަކަށް އެހީތެރިކަން ފޯރުކޮށްދީ 528 ވެލިބަސްތާ ޖަހައިދީފައިވާ ކަމަށް ވެސް އެ އިދާރާ އިން ވިދާޅުވެއެވެ.