މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބޯޑުން އިބްރާހިމް ނޫރައްދީން ވަކިކޮށްފިއެވެ.

ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ހިންގާ އެމްއޭސީއެލްގެ ބޯޑު މެމްބަރުކަމުން އޭނާ ވަކިކޮށްފައިވަނީ އޮކްޓޯބަރ މަހު 24 ވަނަ ދުވަހުއެވެ.

އެމްއޭސީއެލްގެ ޑިރެކްޓަރުންގެ ބޯޑަށް ބަދަލު އައިސްފައިކަން އެ ކުންފުނީގެ މުވައްޒަފުންނަށް މިހާރުވަނީ ސަރކިއުލަރއެއް މެދުވެރިކޮށް އަންގާފައެވެ.

އެމްއޭސީއެލްގެ ބޯޑަށް މި ގެނައި ބަދަލާއެކު އެ ބޯޑުގައި މިހާރު ތިއްބެވީ ފަސް މެންބަރުންނެވެ. އެއީ މެނޭޖިން ޑައިރެކްޓަރު އިބްރާހިމް ޝަރީފް އާއި އިބްރާހިމް ސިޔާދު ގާސިމް އާއިި އިބްރާހިމް މަހުދީއާއި ސަހަރު ވަހީދު އަދި މުހައްމަދު ރިޔާޒު އެވެ.

އެމްއޭސީއެލްގެ ބޯޑުން އިބްރާހިމް ނޫރައްދީން ވަކިކުރީ ކީއްވެ ކަމެއް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ހާމަކޮށްފައެއް ނުވެއެވެ.

އިބްރާހިމް ނޫރައްދީން ވަނީ 2005 ވަނަ އަހަރުން ފެށިގެން އޮކްޓޯބަރު 2008 އަށް އެމްއޭސީއެލްގެ ބޯޑު މެމްބަރުކަން ކުރައްވާފައެވެ. އަދި އެމްޑީޕީގެ ފުރަތަމަ ވެރިކަމުގައި ޑިސެމްބަރު 2008 ން ފެށިގެން ޖޫން 28، 2010 އާ ހަމައަށް އެ ބޯޑުގެ ޗެއަރމަންގެ މަގާމު ވެސް ވަނީ އަދާކުރައްވާފައެވެ.

އެންމެ ފަހުން އިބްރާހީމް ނޫރައްދީން ބޯޑު މެންބަރުކަމަށް އައްޔަންކޮށްފައިވަނީ 2019 ވަނަ އަހަރުއެވެ.