ގެވެށި އަނިޔާއާއި ކުޑަކުދިންނަށް ކުރާ އަނިޔާ ފަދަ މައްސަލަތަކަށް ޢާންމުންގެ ހޭލުންތެރިކަން މިހާރު އިތުރުވަމުން އަންނަކަން ފާހަގަކުރެވޭ ކަމަށް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ހާމަކުރައްވައިފިއެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން އެ ވުޒާރާގެ ލީޑް ސޯޝަލް ވޯކަރ އަކްރަމް ޙުސައިން ވިދާޅުވީ އިބަމަ ޕްރޮގްރާމްގެ ޒަރިއްޔާއިން އާއިލާތަކުގެ ހާލަތު ވަރަށް ގާތުން ދެނެގަނެވޭކަމަށެވެ. އަދި އެޕްރޮގްރާމް މިހައިތަނަށް 140 އަށްވުރެ ގިނަ ރަށުގައި ފަށައި، ނާޒުކު ހާލަތްތަކުގައި ދިރިއުޅޭ ފަރާތްތަކަށް މެދު ނުކެނޑި އެހީތެރިކަން ފޯރުކޮށްދެމުން އަންނަކަން ފާހަގަކުރެއްވިއެވެ.

މީގެއިތުރުން މި ޕްރޮގްރާމާއެކު ނާޒުކު ހާލަތްތަކުގައި ދިރިއުޅޭ މީހުންނަށް ބޭނުންވާ އެހީތެރިކަން ފޯރުކޮށްދޭން ފެށުމުން ދައުލަތުގެ ބެލުމުގެ ދަށަށް ގެންދަންޖެހޭ މީހުންގެ އަދަދު ވެސް މަދުވެފައިވާ ކަމަށާއި އިޖުތިމާއީ މައްސަލަތައް ހުށައަޅާ މިންވަރު ވެސް މަދުކަން އޭނާ ފާހަގަކުރެއްވިއެވެ. އަދި ހުށައެޅޭ މައްސަލަތައް ވެސް ކުރިއަތްވުރެއް މަދުކަމަށް ވިދާޅުވިއެވެ.

އެ މިނިސްޓްރީން ކުރިއަށްގެންދާ ޕްރޮގްރާމުތަކުގެތެރޭގައި އިޖްތިމާޢީ ބަދަހި މަދަދުވެރިން (އިބަމަ) އާއި، "ހާލު ކިހިނެއް؟" ޕްރޮގްރާމު ހިމެނެއެވެ. އަދި އަމާޒަކީ އަންނަ އަހަރުގެ ޖޫން މަހުގެ ކުރިން ރާއްޖޭގެ ހުރިހައި ރަށެއްގައި އިބަމަ ގްރޫޕްތައް ގާއިމްކުރުން ކަމުގައި މިނިސްޓްރީން ވިދާޅުވެއެވެ.