ރާއްޖެ އޮތް ނާޒުކު ހާލަތުން އާންމު ހާލަތަށް ގެނެސްދެއްވީ ރައީސް ޑރ. މުޙައްމަދު މުޢިއްޒު ކަމުގައި ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މީލާދީ އައު އަހަރު ފެށުމުގެ ގޮތުން ހުޅުމާލޭގައި ކުރިއަށް ގެންދިޔަ ހަރަކާތްތައް ބައްލަވާލައްވައި، ނޫސްވެރިންނަށް މައުލޫމާތު ދެއްވަމުންނެވެ.

މިނިސްޓަރު ވަނީ ރައީސް ޑރ. މުޢިއްޒު ރާއްޖޭގެ ވެރިކަމާއި ހަވާލުވެވަޑައިގެންނެވިއިރު، ރާއްޖެ އޮތީ ވަރަށް ނާޒުކު ފައްތަރެއްގައި ކަމަށާއި އެ ހާލަތު ބަދަލުކޮށްލެއްވީ ރައީސް ކަމަށެވެ. އަދި ރާއްޖޭގެ ފަތުރުވެރިކަން ވެސް މިހައި ހިސާބަށް އައީ އެ ސަބަބަށްޓަކައި ކަމަށް ވިދާޅުވިއެވެ.

ހާއްސަކޮށް އަވަށްޓެރި އިންޑިއާ އާއެކު އޮތް ގުޅުން ވަރަށްބޮޑަށް ހީނަރުވެފައިވާކަން ފާހަގަކުރައްވައި، މިނިސްޓަރު ވަނީ އެ ހީނަރުކަމަށް ބަދަލު ގެނެސްދެއްވީ ވެސް ރައީސްކަން ފާހަގަކުރައްވާފައެވެ. އަދި އެގައުމުގެ ފަތުރުވެރިން ރާއްޖެ އަންނަން ފެށީ އިންޑިއާގެ ބޮޑުވަޒީރު ނަރެންދުރަ މޯދީ ބޮޑުވަޒީރުކަމުގެ ހުވާ ކުރެއްވުމުގެ ރަސްމިއްޔާތަށް ރައީސް ވަޑައިގަތުމުންކަން ފާހަގަކުރެއްވިއެވެ.

މީގެއިތުރުން މިއަހަރުގެ މިހައިތަނަށް 2 މިލިއަން ފަތުރުވެރިން އައިސްފައިވާއިރު، އެންމެބޮޑު އެއްބާރުލެއްވުމެއް ދެއްވީ އެމަނިކުފާނު ކަމުގައި ވިދާޅުވިއެވެ.