އިމްޕޯޓް އެކްސްޕޯޓް ވިޔަފާރިތަކަށް އިތުރު ލުއިފަސޭހަ ގޮތްތަކެއް ތަނަވަސްކޮށްދިނުމަށް ސަރުކާރުން މަސައްކަތް ކުރައްވަމުން ގެންދަވާކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މާލޭ ކޮމާޝަލް ހާބަރަށް ޒިޔާރަތްކުރައްވައި، ބަނދަރުގެ މަސައްކަތްތައް ހިނގަމުންދާ ގޮތް ބައްލަވައިލެއްވުމަށްފަހުގައެވެ.

މިނިސްޓަރު ވިދާޅުވީ ރާއްޖޭގެ ކޮމަރޝަލް ބަނދަރުގެ ހިދުމަތްތައް އިތުރަށް ހަރުދަނާ ކުރުމަށް ސަރުކާރުން ކެނޑިނޭޅި ގިނަގުނަ މަސައްކަތްތަކެއް ކުރަމުންދާ ކަމަށެވެ.

އެ ބަދަލުކުރުމުގެ މަޝްރޫއާއި ތިލަފުށީ ބަނދަރު ތަރައްގީކުރުމުގެ މަޝްރޫއުގެ މަސައްކަތާއި ބަނދަރުގެ އެކި ސަރަހައްދުތަކަށް މިނިސްޓަރު ވަނީ ޒިޔާރަތްކުރައްވާފައެވެ. އަދި މުވައްޒަފުންނާ ބައްދަލުކުރައްވައި، ބަނދަރުގެ އިތުރު މަސައްކަތްތައް ކުރިއަށްދާ ގޮތާއި ބެހޭގޮތުން ވެސް މައުލޫމާތު ސާފުކުރައްވާފައި ވެއެވެ.

މާލޭ ކޮމަރޝަލް ހާބަރަށް ދިމާވެފައިވާ ޖާގައިގެ ދަތިކަން ހައްލުކުރުމަށް މި ސަރުކާރުން މާލޭ ޕޯޓު ތިލަފުއްޓަށް ބަދަލުކުރަން ހަމަޖެހިފައިވާކަމަށް އެމްޕީއެލްގެ ސީއީއޯ މުހައްމަދު ވަޖީހު މީގެކުރިން ވަނީ ވިދާޅުވެފައެވެ. އަދި މާލޭ ހާބަރަށް 38 އަހަރު ވީއިރު، އެ ޕޯޓުގެ ސައިޒަކީ އަދިވެސް 2،000 ކޮންޓެއިނަރުގެ ސައިޒު ކަމަށާއި މި މައްސަލައަށް ހައްލު ހޯދުމަށް މަސައްކަތްކުރަމުންދާ ކަމަށް ވެސް ވިދާޅުވެފައި ވެއެވެ.