ކަޝްމީރު ބްލެކް ޑޭ ފާހަގަކުރުމަށް ހާއްސަ ހަފުލާއެއް ބާއްވައިފިއެވެ.

ހުޅުމާލޭގައި ހުންނަ ޕާކިސްތާނު ހައި ކޮމިޝަނުގައި އޮކްޓޯބަރ 27 ގައި ބޭއްވި މި ހަފުލާގައި ރާއްޖޭގައި އުލޭ ގިނަ އަދަދެއްގެ ޕާކިސްތާނު ރައްޔިތުން ވަނީ ބައިވެރިވެފައެވެ.

މި ހަފުލާގައި ވާހަކަ ދައްކަވަމުން ރާއްޖޭގައި ހުންނަ ޕާކިސްތާން ހައި ކޮމިޝަނަރ ހިޒް އެކްސެލެންސީ ވައިސް އެޑްމިރަލް (ރ) މުޙައްމަދު ފައްޔާޟް ގީލާނީ ވަނީ ކަޝްމީރު ބްލެކް ޑޭގެ ތާރީހީ މުހިންމުކަން ފާހަގަކުރައްވާފައެވެ.

އިންޑިއާގެ ޣައިރު ގާނޫނީ އޮކިއުޕޭޝަން ބާރުތަކުން އިންޑިއާ އޮކިއުޕައިޑް ޖައްމޫ އެންޑް ކަޝްމީރު (އައި.އައި.އޯ.ޖޭ.ކޭ) ގައި ވޭތުވެދިޔަ 77 އަހަރު ދުވަހު ހިންގާފައިވާ އަނިޔާވެރި ޢަމަލުތައް ވެސް ވަނީ ކުށްވެރިކުރައްވާފައެވެ.

"އަމިއްލަ ނަފްސު ކަނޑައެޅުމުގެ ހައްގަށްޓަކައި ކުރާ އަދުލުވެރި ނިޒާލުގައި އަޅުގަނޑުމެންގެ ކަޝްމީރު އަޚުންނާއި އުޚުތުން ވަނީ ޤުރުބާންވެފަ. އެ ޤުރުބާނީތައް އަޅުގަނޑުމެން އަބަދުވެސް ހަނދާންކުރާނެ. އިންޑިއާގެ ޢަމަލުތަކުން ޚިލާފުވެފައިވަނީ އދ. ގެ ސަލާމަތީ މަޖިލީހުގެ ޤަރާރުތަކާ." އެމަނިކުފާނު ވިދާޅުވިއެވެ.

މީގެއިތުރުން އެ ގަރާރުތަކުގައި ބުނެފައިވަނީ ޖައްމޫ އަދި ކަޝްމީރުގެ ދައުލަތާ ގުޅޭގޮތުން ނިންމާ އެންމެ ފަހުގެ ނިންމުން ނިންމަންވާނީ ކަޝްމީރު ރައްޔިތުންގެ އިރާދައާ އެއްގޮތަށް، މިނިވަން އަދި ވަކިފަރާތަކަށް ނުޖެހޭ ވޯޓެއް ނަގައިގެންކަން ވެސް ހައިކޮމިޝަނަރ ފާހަގަކުރެއްވިއެވެ.

މިރަސްމިއްޔާތުގައި ހައިކޮމިޝަންގެ ޑެޕިއުޓީ ހެޑް މިސްޓަރ ޛުލްޤުރުނައިން އަޙްމަދު ވެސް ބައިވެރިވެވަޑައިގެން ވަނީ ޝުކުރުއަދާކުރައްވާފައެވެ.