އެމްޑީޕީ ސަރުކާރުން ހިންގި ބޯހިޔާވަހިކަމުގެ މަޝްރޫއު 'ގެދޮރުވެރިޔާ ސްކީމް' ގެ ދަށުން ފްލެޓޫ ލިބުނު މީހުންގެ ލިސްޓު އާންމުކުރުން ސަރުކާރުން އަނެއްކާ ވެސް ފަސްކޮށްފިއެވެ.

ހައުސިންގ މިނިސްޓްރީން އޮކްޓޯބަރ 28 ވަނަ ދުވަހު އެ މިނިސްޓްރީން ނެރުއްވި ބަޔާނެއްގައި ވަނީ 4000 ހައުސިން ޔުނިޓް ލިބޭ މީހުންގެ ލިސްޓް އަލުން ބަލައި، ހައްގު ފަރާތްތަކަށް ފްލެޓު ލިބޭކަން ކަށަވަރުކުރުމަށް އިތުރު ވަގުތު ބޭނުންވާ ކަމަށެވެ. އެހެންކަމުން ފައިނަލް ލިސްޓު ނެރެވޭނީ އަންނަ ނޮވެމްބަރު މަހުގެ ދެވަނަ ހަފުތާގެ ތެރޭގައިކަމަށް އެ ބަޔާނުގައިވެއެވެ.

އެ މިނިސްޓްރީން މީގެކުރިން ވިދާޅުވެފައިވަނީ އެ ސްކީމްގެ ދަށުން ދޫކުރަން ނިންމި 4000 ހައުސިންގ ޔުނިޓް ލިބޭ މީހުންގެ ދާއިމީ ލިސްޓް މިމަހު އާންމު ކުރެވޭނެކަމަށެވެ.

2022 ވަނަ އަހަރު މާލެ ސަރަހައްދުން ފްލެޓް ދޫކުރުމަށް އިއުލާނުކުރި "ގެދޮރުވެރިޔާ" ސްކީމުން ފްލެޓް ލިބޭ މީހުން ކަނޑައަޅާ އެކަމުގެ ލިސްޓު އާއްމުކުރީ އެމްޑީޕީ ސަރުކާރުގެ ދައުރު ނިމެން އުޅެނިކޮށްނެވެ.

ގެދޮރުވެރިޔާ ސްކީމްގެ ދަށުން ފްލެޓަށް އެދި 20607 މީހުން ފޯމު ހުށަހަޅާފައިވާއިރު،ޝަރުތު ހަމަވެ 13000 މީހުންނަށް ފްލެޓް ދިނުމަށް، އެމްޑީޕީ ސަރުކާރުން ވަނީ ނިންމަވާފައެވެ. އެހެންނަމަވެސް ދައުރު ނިމުނުއިރު އިމާރާތްކުރުމުގެ ޢަމަލީ މަސައްކަތް ކުރިއަށްދިޔައީ 4000 ފްލެޓްގެއެވެ.

އެހެންކަމުން ފުރަތަމަ އެކުލަވާލާ އިޢުލާނުކުރީ 4000 ފްލެޓް ލިބޭ މީހުންގެ ލިސްޓެވެ.

މިނިންމުމާއި ގުޅިގެން ޝަކުވާއަށް ހުށައެޅުމަށް ހުޅުވާލުމުން 7500 އަށްވުރެ ގިނަ މީހުން ޝަކުވާ ހުށައެޅިއިރު، 300 އަށްވުރެ ގިނަ މީހުން ވަނީ އެންޓި ކޮރަޕްޝަން ކޮމިޝަނަށް ވެސް މައްސަލަ ހުށަހަޅާފައެވެ.

4000 ފްލެޓް ލިސްޓުގެ މައްސަލައިގައި ކޮމިޓީގެ މަސައްކަތްތައް މުޅިންހެން ނިންމާފައިވާއިރު، ކޮމެޓީގެ ނިންމުންތައްވަނީ ހައިސިންގ މިނިސްޓަރ ޑރ. އަލީ ޙައިދަރު އަޙުމަދަށާއި މިނިސްޓްރީ އަށް ހުށައަޅާފައެވެ. ހައުސިންގ މިނިސްޓްރީން ވަނީ ނޮވެމްބަރ މަހު ލިސްޓު ނެރޭއިރު، ފްލެޓު އޭގެ ހައްގުވެރި ފަރާތްތަކަށް ލިބޭކަން ކަށަވަރުކުރާނެކަމުގެ ޔަގީންކަން ދެއްވާފައެވެ.