އިންދިރާގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އައިވީއެފް ހަދަން ފެށުމަށް ނިންމައިފިއެވެ.

މިކަން ހާމަކުރެއްވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ޙަލީމް އެވެ.

އޭނާ ވިދާޅުވީ އެ ހޮސްޕިޓަލުގައި ފާޓިލިޓީ ސެންޓަރެއް ގާއިމްކޮށް މިއަހަރުގެ ތެރޭގައި އައިވީއެފް ހެދުމުގެ މަސައްކަތް ކުރަމުން އަންނަ ކަމަށެވެ.

ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ފާޓިލިޓި ސެންޓަރު ތަރައްގީކޮށް، ހިދުމަތް ދޭން ފެށުމަށް ތައްޔާރުވަމުން އަންނައިރު، ހިދުމަތް ފެށުމަށް އަންހެނުންގެ ބަލިތަކަށް ހާއްސަ ޑޮކްޓަރުންގެ ޓީމެއް މިހާރުވެސް ތަމްރީން ހަދާފައިވާކަމަށް އޭނާ ވިދާޅުވިއެވެ.

" އެޚިދުމަތް ފެށުމަށް ވަރަށް ބާރު ސްޕީޑްގައި މަސައްކަތް ދަނީ ކުރަމުން. ފާޓިލިޓީ ސެންޓަރޭ މި ބުނީ އޭގެ ފުރިހަމަ މާނައިގައި. އައިވީއެފްއާއި އައިޔޫއައި ހެދޭނެ ފެންވަރަށް ހުރިހާ އިކުއިޕްމަންޓްތަކާއި އެކަމަށް ބޭނުންވާ އެކްސްޕާޓުންގެ އެހީއާއެކު." އިބްރާހީމް އަބްދުއްރައްޒާގު ޙަލީމް ވިދާޅުވިއެވެ.

އެންސްޕާ އިން ހަދާފައިވާ ގައިޑްލައިނަށް ފެތޭ މީހުންނަށް އެ އެހީގެ ދަށުން ފަރުވާ ކުރިއަށް ގެންދާނެ ކަމަށް އައިޖީއެމްއެޗުން ވަނީ ކުރިން ވެސް ހާމަކުރައްވާފައެވެ.

ރާއްޖޭގައި މިވަގުތު އައިވީއެފް ހަދައިދެނީ ޓްރީޓޮޕް ހޮސްޕިޓަލުގައި އެކަންޏެވެ.

އައިވީއެފް ފަރުވާއަށް އެދި ހުށަހެޅުމަށް ހުޅުވާލި ފުރުސަތުގައި ފުރަތަމަ ބުރު 153 މީހަކުވަނީ ފޯމު ހުށައަޅާފައެވެ. މީގެތެރެއިން ޝަރުތު ހަމަވާ 37 މީހެއްގެ ލިސްޓު މިހާރުވަނީ އާއްމުކޮށްފައެވެ.

ގުދުރަތީ ގޮތުން ދަރިން ނުލިބޭނަމަ، އެކަމަށް އޮތް ފަރުވާއަކީ އައިޔޫއައި އަދި އައިވީއެފް މެދުވެރިކޮށް ދަރިން ހޯދުމެވެ.

ދަރިމައިވުމުގެ މައްސަލަތަކަކީ ރާއްޖޭގައި ގިނަ މައްސަލަތަކަކަށްވާއިރު، އެ ފަރުވާއަށް ބޮޑު ހޭދައެއްކޮށް ރާއްޖޭން ބޭރުން ހިދުމަތް ހޯދަން ޖެހުމަކީ ގިނަ ބައެއްގެ ވަރަށް ބޮޑު ކަންބޮޑުވުމަަކަށް ވަނީ ވެފައެވެ.