ގުޅީފަޅުން ގޯތި ލިބުނު މީހުންނަށް ރަޖިސްޓްރީ ހަވާލުކުރުމުގެ މަސައްކަތްތައް ދެތިން މަހެއްގެ ތެރޭގައި ނިންމާލެވޭނެކަމަށް އުއްމީދު ކުރައްވާ ކަމުގައި ހައުސިންގ މިނިސްޓަރ ޑރ. އަލީ ހައިދަރު އަހްމަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ގުޅީފަޅުން ގޯތި ލިބޭ މީހުންގެ މެދުގައި ގުރުއަތުލުން ކުރިއަށްދާގޮތާއި ގުޅޭގޮތުން 'ޕީއެސްއެމް' އަށް ދެއްވި ބަސްދީގަތުމެއްގައެވެ.

މިނިސްޓަރު ވިދާޅުވީ ގުޅީފަޅުން ބިން ކަނޑާ ހަވާލުކުރެވޭނީ ތިލަމާލެ ބްރިޖުގެ މަސައްކަތް ނިމުމުންކަމަށެވެ.

ގުޅީފަޅުގައި މިހާރު އެކުލަވާލާފައިވާ ލޭންޑް ޔޫސް ޕްލޭނަކީ އެތަނުގައި ދިރިއުޅޭ މީހުންނަށް ވީހާވެސް ހިތްފަސޭހަ މާހައުލެއްގައި ދިރިއުޅެވޭނެ މަގު ތަނަވަސްކޮށްދެވޭނެ ގޮތަކަށް ހަދާފައިވާ ޕްލޭނެއް ކަމަށެވެ. އަދި ގުޅިފަޅު ވާނީ އިޖްތިމާއީ ބޭނުންތަކާއި އިގްތިސާދީ ބޭނުންތަކާއި މުނިފޫހި ފިލުވުމުގެ ގޮތުން ކުޅިވަރު ކުޅޭވޭނެ ސަރަހައްދުތައް ވެސް ކަނޑައަޅައިގެން ތައްޔާރުކޮށްފައިވާ ލޭންޑް ޔޫސް ޕްލޭނަކަށް ކަމަށެވެ.

މީގެއިތުރުން ގޯތި ލިބުނު މީހުންނަށް ބިން ކަނޑައެޅުމުގެ ކަންކަން ކުރިއަށް ގެންދަނީ އިންސާފުވެރިކަމާއެކީގައިކަން ފާހަގަކުރައްވައި، އެކަމުގައި އެއްވެސް މީހެއްގެ ނުފޫޒެއް ނޯންނާނެކަމުގެ ޔަގީންކަން ވެސް ދެއްވިއެވެ.