ފަލަސްތީނަށް އެހީވުމަށް ފަންޑްރެއިޒިންގ ހަރަކާތެއް ބޭއްވުމަށް ނިންމައިފިއެވެ.

"ދިވެހިންނެއް ހަނދާނެއް ނުނެތޭ! އަހަރެންވެސް ފަލަސްޠީނާއެކު " މި ޝިއާރުގެ ދަށުން ޚިދުމަތް ޖަމިއްޔާގެ ފަރާތުން އިންތިޒާމުކުރާ މި ހަރަކާތް ބޭއްވުމަށް ތާވަލުކޮށްފައިވަނީ ނޮވެމްބަރު މަހުގެ 1، 2، އަދި 3 ވަނަ ދުވަހުއެވެ.

އެ ޖަމިއްޔާ އިން 'އޮއިވަރު' އަށް މައުލޫމާތު ދެއްވާފައިވާ ގޮތުގައި ރާއްޖޭގެ އެކި ސަރަހައްދުތަކުގައި ފަންޑްރެއިޒިންގ އިވެންޓްތަކެއް ބޭއްވުމަށް ދަނީ މަސައްކަތްކުރަމުންނެވެ.

މިއީ ހަނގުރާމަ ފެށުނުތާ އެއް އަހަރު ފާއިތުވެ ގޮސްފައިވާއިރުވެސް، ހަނގުރާމަ ނުހުއްޓި ކުރިއަށްދާތީ، ޣައްޒާގެ އެތައް ހާސް ރައްޔިތުންނެއް ހާލުގައި ޖެހިފައިވާތީ އެކަމަށް އެހީތެރިކަން ފޯރުކޮށްދިނުމުގެ މަގްސަދުގައި ބާއްވާ ހަރަކާތެއް ކަމަށް އެ ޖަމިއްޔާ އިން ވިދާޅުވިއެވެ.

"އަޅުގަނޑުމެން ކޮންމެ މީހަކަށްވެސް މި މަތިވެރި މަސައްކަތުގައި ބައިވެރިވެވިދާނެ. އަމިއްލަ ފަރުދުންގެ ހައިސިއްޔަތުން ނުވަތަ ޖަމްޢިއްޔާ ޖަމާޢަތްތަކުގެ ތެރެއިން މި ފަންޑްރެއިޒިންގ އިވެންޓްތަކުގައި ބައިވެރިވެލައްވަން ބޭނުންވާ ފަރާތްތަކަށް މި ފުރުޞަތު ވަނީ ހުޅުވާލެވިފަ." ޚިދުމަތް ޖަމިއްޔާ އިން ބުނެއެވެ.

މީގެއިތުރުން ދިވެހިންނަކީ ފަލަސްތީނުގެ މައްސަލައިގައި އަބަދު ވެސް ސާބިތުކަމާއެކު ތިބޭ ބައެއްކަން ފާހަގަކޮށް އަޅުގަނޑުމެންގެ އަޚުންނާއި އުޚްތުންގެ ހައްގުގައި އަޑުއުފުލައި، އެމީހުންނަށް އެހީތެރިވުމަކީ އަޅުގަނޑުމެންގެ ދީނީ އަދި އިންސާނީ ވާޖިބެއްކަމަށް ވެސް އެ ޖަމިއްޔާ އިން ފާހަގަކުރެއެވެ.

މި ފަންޑް ރެއިޒިން އިވެންޓް ރާއްޖޭގެ ބޮޑެތި އާބާދީތަކުގައި ވެސް ކުރިއަށްދާއިރު، މާލެ، ވިލިމާލެ އަދި ހުޅުމާލެ ސަރަހައްދުގެ މިސްކިތްތަކުގައި ފަންޑް ފޮށި ބެހެއްޓުމަށް ވަނީ ހަމަޖެހިފައެވެ. އަދި ރަސްފަންނު އަދި އާޓިފިޝަލް ބީޗް ސަރަހައްދުގައި ވެސް މިހަރަކާތްތައް ކުރިއަށް ގެންދަން ވަނީ ހަމަޖެހިފައެވެ.

މިހާރު ބައެއް ރަށްރަށަށް މިއިވެންޓަށް ބޭނުންވާ ސާމާނުތައް ދަނީ ހިދުމަތް ޖަމިއްޔާގެ ފަރާތުން ފޯރުކޮށްދެމުންނެވެ. އެގޮތުން ޓީޝާޓާއި ބެނަރ އަދި ލީފްލެޓް ފަދަ ސާމާނުތައް ދަނީ ފޯރުކޮށްދެމުންނެވެ.

ޚިދުމަތް ޖަމިއްޔާގެ އެދުމަކީ ޣައްޒާ ގެ މުސްލިމުންނަށް އެހީ ފޯރުކޮށްދިނުމުގެ މަސައްކަތްތައް ވީހާވެސް ގިނަ ބަޔަކު އެހީތެރިވެ މިފަންޑްރައިޒް އިވެންޓް ކާމިޔާބު ކަމާއެކީ ނިންމާލުން ކަމުގައި އެ ޖަމިއްޔާ އިން ބުނެއެވެ.

މިފަންޑްރައިޒް އިވެންޓާއި ގުޅޭ އިތުރު މަޢުލޫމާތު ހޯއްދެވުމަށް ޖަމިއްޔާގެ ހޮޓްލައިން 7353339 ގުޅުއްވުން އެދެއެވެ.

ޣައްޒާގެ މުސްލިމުންގެ ހާލަތު މިހާރު ހުރީ ވަރަށް ދަށުދަރަޖައިގައެވެ. ޝަހީދުވާ ފަރާތްތަކަށް ކަފުން ހުސްވެފައިވާ އިރު ބޯ ފެނާއި ކާބޯތަކެތި ހުސްވެފައިވާ ވާއިރު އަނިޔާވެގެން ހޮސްޕިޓަލުގައި ފަރުވާދެމުންދާ ފަރާތްތަކަށް ފޯރުކޮށްދިނުމަށް ބޭނުންވާ ބޭސް ހުސްވެ އެބައިމީހުން މަރުވާން ދޫކޮށްލަން ޖެހޭ ހާލަތުގައި ހުރިކަމަށް މައުލޫމާތު ވަނީ ލިބިފައެވެ.